Ministrja e Ekonomisë, Milva Ekonomi, kërkoi monitorim nga tatimorët për afishimin e çmimeve, ndërsa nga subjektet private që menaxhojnë plazhet, të pajisen me NIPT.
Ministrja e Ekonomisë deklaratat i dha pas përfundimit të mbledhjes me Task-Forcën për turizmin, ku u prezantuan vëzhgimet e raportuara nga katër grupet e punës të Ministrisë së Ekonomisë, që monitoruan për dy javë në terren situatën nga Velipoja deri në Sarandë.
Ministrja Ekonomi solli në vëmendje shqetësimet e mbërritura nga qytetarët, që lidhen me abuzimet mbi çmimet, pastrimin e plazheve apo furnizimit me energji elektrike.
“Do të kërkoja nga Drejtoria e Përgjithshme e Tatimeve që në kontrollet e tyre të përfshijnë edhe monitorimin e afishimit të çmimeve në hotele dhe restorante, në mënyrë që qytetarët të jenë të mirinformuar”, tha Ekonomi.
Për sa i përket informalitetit, ministrja Ekonomi kërkoi rritjen e vëmendjes për pajisjen me NIPT të subjekteve private e, në veçanti, të atyre që kanë lidhur kontrata me bashkitë dhe kanë ndërtuar stacionet e plazheve private.
Për pastrimin e plazheve, Ekonomi kërkoi më shumë bashkëpunim me vendorët.
“Nga informacionet e deritanishme vërejmë se në përgjithësi turizmi është duke u zhvilluar mirë, por ka raste kur ne duhet të ndërhyjmë. Nevojitet një bashkëpunim akoma edhe më i shtuar me njësitë e pushtetit vendor për sa i përket pastrimit të plazheve publike”.
Panorama/d.i.
