Një propozim i veçantë vjen nga Shoqata e tur-operatorëve dhe agjencive turistike në një letër drejtuar Presidentit të Republikës, Bujar Nishani, Kryeministrit Edi Rama, kryetarit të Kuvendit, Ilir Meta dhe kryetarit të opozitës, Lulzim Basha.
Ata kërkojnë që zgjedhjet e ardhshme parlamentare të mos mbahen në muajt e verës.
Shoqata e agjencive turistike në kërkesën e saj argumenton se nëse zgjedhjet e ardhshme mbahen gjatë sezonit turistik, do të ndikojnë negativisht në turizëm. Shoqata ngre si shqetësim klimën e tensionuar politike që prodhojnë proceset zgjedhore, çka sjell edhe largimin e turistëve të huaj.
Për shkak të efekteve negative kreu i kësaj shoqate, Kliton Gërxhani, rekomandon mbajtjen e zgjedhjeve në muajin tetor.
“Duke qenë se aktiviteti turistik në Shqipëri është i përqendruar kryesisht gjatë muajve të verës, mbajtja e zgjedhjeve parlamentare, apo edhe atyre lokale, në periudhën e kulmit të sezonit turistik jep një ndikim të madh negativ në sektorin e turizmit në veçanti dhe në ekonominë e vendit në tërësi.
Paralelisht me këtë problem, angazhimi i qytetarëve në fushatën zgjedhore, por jo vetëm, edhe gjatë periudhës post-zgjedhore krijon një ngërç në këtë aktivitet. Nga ana tjetër, përvoja ka treguar se çdo vit zgjedhor nuk kalon pa një klimë të tensionuar politike.
Ky është një tjetër fakt që pengon thithjen e turistëve të huaj, të cilët duan të vizitojnë Shqipërinë. Duke e konsideruar turizmin si një sektor të rëndësishëm me impakt thelbësor në ekonominë e vendit, ne si biznese jemi të ndjeshëm ndaj çdo zhvillimi që ndikon në fushën ku operojmë”, thuhet në letrën e operatorëve turistikë dërguar krerëve të lartë të shtetit, raporton express. Në këto kushte, biznesi rekomandon që zgjedhjet të mbahen në muajin tetor.
“Propozimi ynë është që ato të mbahen në muajin tetor 2017, si periudha që do të jepte më pak ndikim negativ në turizëm, e për rrjedhojë në ekonomi”, përfundon kërkesën e tij biznesi i turizmit.
