Ish-ministri i Brendshëm, Saimir Tahiri, është paraqitur ditën e sotme në Prokurorinë e Krimeve të Rënda për të dhënë deklarime para dy prokurorëve që po hetojnë dosjen e Emiljano Shullazit, raporton “Panorama”. Tahiri është thirrur për të dhënë shpjegime një javë pas marrjes në pyetje të drejtorit të Policisë së Tiranës, Ervin Hodaj. Zyrtarët e lartë po merren në pyetje nga Prokuroria në lidhje me ngjarjen e kërcënimit të rektorëve Mynyr Koni e Dhori Kule, në prill 2016. Dyshohet se dy akademikët janë kërcënuar nga ana e Emiljano Shullazit dhe grupit të tij në kulmin e zgjedhjeve për në universitete.
Pas dëshmisë së Tahirit në Prokurorinë e Krimeve të Rënda, pritet të paraqitet edhe ministrja e Arsimit, Lindita Nikolla. Burimet e Prokurorisë kanë thënë se edhe Nikolla, ashtu sikurse Tahiri, do të merret në pyetje në lidhje me kërcënimin e rektorëve Mynyr Koni e Dhori Kule.
a.ç
