Prokuroria e Krimeve të Renda ka nisur fletëthirrje për ministrin e brendshëm në detyrë, Saimir Tahiri në lidhje me ngjarjet e ndodhura ditën e kërcënimit të rektoreve Dhori Kule dhe Mynyr Koni në prill të vitit 2016.
Sipas burimeve, Tahiri është thirrur për të dëshmuar në lidhje me masat dhe mënyrën së si është vënë në dijeni për kërcënimin e Mynyr Konit dhe Dhori Kules në prill të 2016. Mësohet se Tahiri do të merrejt në pyetje brenda javës që vjen.
Edhe Drejtori i Policisë së Tiranës, Ervin Hodaj, është thirrur për të dhënë deklarime për çështjen e Emiljano Shullazit.
Shoqërimi e më pas arrestimi i Emiljano Shullazit në prill të vitit 2016 shënoi një përplasje mes Policisë dhe Prokurorisë. Kjo pasi rasti i kërcënimit të rektorëve Dhori Kule e Mynir Koni u bë publik nga ish-kryeministri Sali Berisha, pasi dy të dëmtuarit nuk kishin bërë kallëzim.
Ndërsa Policia e shoqëroi Shullazin për ta marrë në pyetje në lidhje me kërcënimin e rektorëve dhe po përgatitej ta linte të lirë, dy oficerë të Krimeve të Rënda paraqitën dorazi në Drejtorinë e Policisë së Tiranës urdhër-arrestin e Prokurorisë së Krimeve të Rënda.
Kanosja ndaj dy profesorëve Mynyr Koni dhe Dhori Kule, ndodhi në kohën e zgjedhjeve për organet drejtuese në universitete.
Ajo që bën përshtypje në këtë çështje është se Prokuroria e Krimeve të Rënda nuk ka lëshuar ende një fletë thirrje për Sali Berishën, i cili me të madhe e denoncoi çështjen publikisht, shkruan gazeta Tema.
Sipas gazetës Tema, prokuroria e Krimeve të Rënda vendosi të thërrasë ministrin Tahiri, që ka bërë detyrën duke pritur në zyrë rektorin, i cili i ka shprehur shqetësimin në lidhje me kërcënimet e Emiljano Shullazit, por nuk e sheh të arsyeshme të dëgjojë dëshminë e denoncuesit Berisha.
a.ç
