Teherani u ka bërë thirrje shteteve të Gjirit se do të ishte “e papranueshme” nëse ata do të lejonin që hapësira e tyre ajrore të përdoret kundër Iranit dhe çdo veprim i tillë do të sillte një përgjigje.
Kështu tha një zyrtar i lartë iranian, mes shqetësimeve rreth hakmarrjes së mundshme izraelite për sulmin raketor iranian të javës së kaluar, citon Reuters.
Reagimet e zyrtarit iranian erdhën në momentin ndërsa Ministri i Jashtëm i Iranit, Abbas Araqchi, udhëtoi drejt Arabisë Saudite dhe shtetet e tjera të Gjirit për bisedime, raporton A2 CNN.
“Irani e bëri të qartë se çdo veprim i një vendi të Gjirit Persik kundër Teheranit, qoftë përmes përdorimit të hapësirës ajrore apo bazave ushtarake, do të konsiderohet nga Teherani si një veprim i ndërmarrë nga i gjithë grupi dhe Teherani do të përgjigjet në përputhje me rrethanat”, tha zyrtari iranian për Reuters.
Komentet pasuan gjithashtu diskutimet midis Iranit dhe kryeqyteteve arabe të Gjirit javën e kaluar në hapjen e konferencës së Azisë në Katar, kur shtetet e Gjirit kërkuan të sigurojnë Iranin për neutralitetin e tyre në çdo konflikt midis Teheranit dhe Izraelit.
“Mesazhi theksoi nevojën për unitet rajonal kundër Izraelit dhe rëndësinë e sigurimit të stabilitetit. Gjithashtu, bëri të qartë se çdo ndihmë për Izraelin, si lejimi i përdorimit të hapësirës ajrore të një vendi rajonal për veprime kundër Iranit, është e papranueshme”, shtoi zyrtari iranian.
Ndërkohë, sipas Reuters, një diplomat perëndimor në Gjirin Persik tha se gjatë takimit të shteteve të Gjirit me Iranin në Doha, Teherani kishte bërë thirrje për unitet rajonal përballë një sulmi izraelit dhe se konsideronte neutralitetin e shteteve të Gjirit një minimum.
Diplomati tha se Irani e kishte bërë të qartë se Teherani do të vëzhgonte nga afër se si çdo vend i Gjirit reagoi në rastin e një sulmi izraelit, dhe gjithashtu se si u përdorën bazat amerikane të vendosura në vendet e tyre.
Katari, Kuvajti, Bahreini, Emiratet e Bashkuara Arabe dhe Arabia Saudite janë vende të cilat kanë objekte ose trupa ushtarake amerikane.
/a.r
