Pas hetimeve të zhvilluara nga njësitet relevante policore, me urdhëresë të gjykatës kompetente është duke u realizuar një operacion policor, i cili përfshin disa lokacione të rajonit të Gjilanit.
Gjatë këtij operacioni deri më tani në cilësinë e të dyshuarve janë arrestuar pesë persona, nën dyshimin e bazuar se janë përfshirë në veprimtari kundër rendit kushtetues dhe sigurisë së Republikës së Kosovës.
“Njëkohësisht, Policia e Kosovës përmes kësaj komunikate zyrtare, me qëllim të informimit të drejtë të opinionit publik, përgënjeshtron disa media/portale serbe, të cilat deklarojnë se po realizohet një operacion policor ndaj disa ish-pjesëtarëve të FSK-së, dhe sqarojmë se këto janë vetëm disa supozime apo spekulime të mediave në fjalë”, thuhet në njoftimin për media.
Policia e Kosovës thotë se garanton të gjithë qytetarët pa dallim se veprimet e saj i bazon në Kushtetutën e vendit dhe Legjislacionit në fuqi, ndërsa operacioni policor është duke vazhduar në bashkëpunim dhe koordinim me autoritetet e drejtësisë. Raportohet se arrestimet kanë të bëjnë me presionet që po iu bëhen serbëve të Kosovës për t’u larguar nga FSK-ja.
ma.me
