Në një intervistë për një nga gazetat më të mëdha në Gjermani, ‘Sueddeutsche Zeitung’ kryeministri Edi Rama ka folur për rekomandimin për hapjen e negociatave, deklaratat e Presidentit francez për zgjerimin, Angela Merkel dhe Ballkanin Perëndimor.
Kryeministri shqiptar nuk bën asnjë kritikë në drejtim të Emmanuel Macron për dekalratën e tij se BE duhet të reformohet para se të zgjerohet, ndërsa shtron pyetjen “Përse duhet të bëhem i keq me presidentin Macron? Ndoshta për shkak se ai e eklipsoi lajmin më të mirë për Shqipërinë prej kohësh?” shkruan Shqiptarja. E ndërsa shprehet se ka deputetë të CDU që nuk e duan hapjen e negociatave me Shqipërinë, ai shton se nëse do të ishte vetëm për Angela Merkel nuk do të kishte asnjë dyshim, duke e cilësuar si partizane të zgjerimit të BE-së. Pas pak ditësh Rama do të vizitojë Berlinin ku do te takohet me Merkel.
Ashtu sikur deklaroi edhe në konferencën me Mogherinin pas marrjes së rekomandimit, Rama tha se nuk po trokasim në derën e BE-së për t’u bashkuar nesër, thjesht duam të ulemi në tryezën e negociatave. Por çfarë ndodh nëse nuk hapen negociatat në qershor? Kryeministri shqiptar ‘kërcënon’ me fluks emigrantësh duke thënë se nëse perspektiva e BE-së është e errët, njerëzit do të duan të largohen nga vendi.
“Ne nuk po trokasim në derën e BE-së për t’u bashkuar nesër, thjesht duam të ulemi në tryezën e negociatave. Rekomandimi i Komisionit nuk është një dhuratë, nuk është lëmoshë, bazohet në arritjet tona. Nëse perspektiva europiane errësohet dhe politika afatshkurtër triumfon mbi strategjinë afatgjatë, njerëzit do të duan të largohen.
Nëse fillojmë negociatat, është një injeksion i fortë i shpresës dhe një perspektivë e qartë për të gjithë. Nuk është vetëm çështje për t’u bërë pjesë e BE-së, është në interes të vetë BE-së që të integrojë Ballkanin Perëndimor, një rajon që qëndron në zemër të Evropës. Ne e dimë se çfarë do të thotë luftë, ne e dimë shkatërrimin që vjen kur nuk zgjedh paqen dhe bashkëpunimin”, tha Rama.
