Deri më 30 prill 2017 të gjithë ata qytetarë të cilët kanë një armë në shtëpi mund ta dorëzojnë vullnetarisht në Polici dhe nuk do të ndiqen penalisht. Nisma për dorëzimin e armëve është futur në projektligjin për amnistinë dhe parashikon që shqiptarëve t’ju jepet një tjetër mundësi për dorëzimin e armëve.
Por shqiptarët duhet të presin që të hyjnë në fuqi ligji për dorëzimin e armëve, i cili më parë duhet të miratohet në Parlament. Në rast se vendosni t’i dorëzoni armët sot atëherë do të ndiqeni penalisht.
Ligji parashikon që dorëzimi i armëve të bëhet pranë komisariateve ose pranë stacioneve të policisë. Për çdo lloj arme që do të dorëzoni, atëherë nuk do të dënoheni. Pritet që dorëzimi i armëve të nisë nga muaji janar.
Ky projektligji është propozuar nga Ministria e Brendshme për shkak se një pjesë e mirë e shqiptarëve kanë armë në shtëpi. Këtë fakt e pohon edhe një raport i Shërbimit Informativ të Shtetit i cili tregon se rreth 40% e familjeve shqiptare kanë një armë në shtëpi.
Lloji më i shpeshtë i armëve që mbajnë shqiptarët është automatiku dhe pistoleta. Por nuk mungojnë as pushkët e gjahut, të cilat një pjesë janë pa leje.
shqiptarja.com/d.i.
