Këngëtari i famshëm serb, Gjorgje Ballasheviç ka vdekur, pasi ishte infektuar me koronavirusin e ri, njoftoi televizioni publik i Serbisë. Ballasheviç ka qenë gjithashtu poet dhe regjisor.
Ai ishte shumë i popullarizuar në vendet e ish-Jugosllavisë edhe pas shpërbërjes së saj në vitet e 90-ta. Më 16 shkurt, Ballasheviç u shtrua në një spital të Novi Sadit dhe u diagnostifikua me pneumoni, që duket se ishte shkaktuar nga koronavirusi.
Këngëtari Ballasheviç, kishte lindur në Novi Sad më 1953. Karrierën e tij e filloi në vitet 1980, fillimisht në grupe muzikore. Ai ishte i njohur për baladat e tij dhe ka publikuar gjithsej 12 albume.
Igor Miroviç, kreu i qeverisë rajonale në Novi Sad, tha se vdekja e Ballasheviçit kishte lënë një “boshllëk të madh dhe të pazëvendësueshëm”.
Ballasheviç ishte i njohur edhe si kritik i ashpër i ish-udhëheqësit jugosllav Sllobodan Millosheviç.
Kur Jugosllavia u shpërbë në luftë etnike në fillim të viteve 1990, Balaseviç kundërshtoi hapur nacionalizmin që nxiti konfliktet. Për shkak të pozicioneve të tij, media kryesore në Serbi iu shmang Balaseviçit gjatë epokës së luftës.
Por ai mbeti i pëlqyer në të gjithë rajonin etnikisht të ndarë të Ballkanit pas luftërave, duke mbushur salla koncertesh në të gjitha vendet që dolën nga gjashtë republikat ish-Jugosllave. Shfaqjet e tij ishin të famshme për komentet e tij në skenë për tema të ndryshme.
Televizioni publik i Kroacisë kujtoi “qëndrimet paqësore dhe kundër luftës të cilat ishin pjesë e shumë këngëve, fjalimeve dhe intervistave” të Ballasheviçit.
g.kosovari
