Prokuroria e Korçës ka nisur hetimet dhe ka vënë nën sekuestro apartamentin në pronësi të këngëtarit të njohur Endri Prifti në Korçë që u shit nga ish-bashkëshortja e tij pas divorcit.
Një javë më parë Endri Prifti bëri një denoncim në emisionin Stop duke deklaruar se ish gruaja i ka grabitur pronën me ndihmën e Kadastrës së Korçës.
Endri Prifti dhe Anjeza Kolevica rezultojnë të ndarë prej vitit 2010 ndërkohë që në vitin 2017 ata i përballën sërish në gjykatë për ndarjen e pasurisë.
Në vitin 2019 gjyqtari Besnik Shehu nxori një vendim, që apartamenti i çiftit që ishte në proces përpjesëtimi, duhet të bllokohej në Kadastrën e Korçës dhe të mos tjetërsohej derisa të përfundonte procesi.
Vendimi i gjyqtarit Besnik Shehu nuk u zbatua nga Kadastra e Korçës me pretendimin se nuk i kishte mbërritur shkresa, në një kohë që gjykata konfirmoi të kundërtën. Sipas Tv Klan për pasojë apartamenti që ishte në emër të ish-gruas, u shit prej saj dy herë brenda 1 muaji.
Ditën e djeshme edhe Kolevica bëri një reagim për akuzat e ish-bashkëshortit duke deklaruar se prona ka qenë në emër të saj, e krijuar përpara martesës. Sipas saj, këngëtari nuk e justifikon pronësinë mbi këtë apartament me të ardhurat e tij.
“Apartamenti ka qenë në pronësinë time dhe nuk ka pasur asnjë marrëveshje të tillë me ish- bashkëshortin tim. apartamenti është blerë para martesës dhe nuk është pronë e përfituar gjatë martesës, duke mos qenë rrjedhimisht një pronë e përbashkët. Unë dhe familja ime nuk kemi paguar vetëm 15 mijë euro, dhe kjo deklarate është krejtësisht e pavërtetë.
Në gjykim gjithashtu është provuar, sikundër është provuar dhe në procesin tjetër gjyqësor të divorcit, që shtetasi Endri Prifti nuk ka asnjë burim të ardhure të ligjshme. Nëse behet një verifikim tek tatimet, ne 15 vitet e fundit, rezulton që Endri Prifti nuk ka asnjë të ardhur”, ka deklaruar Kolevica.
g.kosovari
