Gjykata e Shkallës së Parë e Juridiksionit të Përgjithshëm Lezhë ka caktuar masën e sigurisë “Arrest në shtëpi” për 47-vjeçarin Bledar Arapi, i arrestuar disa ditë më parë në flagrancë si përgjegjës i një kazinoje ilegale të zbuluar në bulevardin “Gjergj Fishta” në qytetin e Lezhës.
Pas shqyrtimit të kërkesës së Prokurorisë dhe dëgjimit të palëve, gjyqtarja Eglantina Biba e vlerësoi të ligjshëm arrestimin në flagrancë dhe pranoi kërkesën e prokurores së çështjes, Irena Sufaj, duke caktuar ndaj Arapit masën e sigurimit “Arrest në shtëpi”, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Prodhimi dhe shitja e narkotikëve.
Sipas vendimit të gjykatës, Bledar Arapi është i detyruar të mos largohet nga banesa e tij. Gjykata urdhëroi gjithashtu lirimin e tij të menjëhershëm nga qelia, pasi ndaj tij nuk ka masa të tjera sigurimi apo dënime për vepra të tjera penale.
Operacioni policor i koduar “Fishat” u finalizua nga Sektori për Hetimin e Krimit Ekonomik dhe Financiar në Departamentin e Policisë Kriminale, në bashkëpunim me Drejtorinë e Forcës së Posaçme Operacionale. Gjatë kontrollit në një godinë trekatëshe, e marrë me qira nga shtetasi Elger Uka, 24 vjeç, i shpallur në kërkim, rezultoi se katet e dyta dhe të treta ishin përshtatur për ushtrimin e lojërave të fatit dhe përdorim droge.
Ndërkohë, Drejtoria e Standardeve Profesionale në Policinë e Shtetit, me urdhër të Drejtorit të Përgjithshëm Ilir Proda, ka nisur një hetim disiplinor ndaj disa drejtuesve dhe punonjësve të policisë, të cilët dyshohet se nuk kanë marrë masa për evidentimin dhe goditjen e kësaj veprimtarie të paligjshme në qendër të qytetit të Lezhës.
