Gjyqtarët e Kosovës, nga sezoni 2017/18, pritet të përfshihen në listat e FIFA-s për të drejtuar ndeshjet e futbollit në garat evropiane. FIFA ia ka konfirmuar Federatës së Futbollit të Kosovës (FFK) se katër referë nga Kosova janë përfshirë në listat për t’iu nënshtruar testimeve dhe për të ndjekur seminaret, në mënyrë që të jenë të gatshëm për edicionin e ardhshëm.
Genc Nuza, Bujar Selimaj, Fatlum Berisha e Lumturie Muhadri priten të jenë gjyqtarët e parë ndërkombëtarë nga Kosova, pas luftës. Ata do të marrin gradën fillestare, nëse kalojnë testet.
Federata e Futbollit e Kosovës kohë më parë ka dërguar në FIFA një listë me emrat e arbitrave që plotësojnë kriteret për të ndarë drejtësinë në arenën ndërkombëtare, por vetëm katër prej tyre janë përzgjedhur, përgatiti Express. (b.an)
