“Katastrofë që vendi është pa opozitë”, Murrizi: S’mund t’i gënjejmë njerëzit sikur PD do bashkohet…

Ish-deputeti i Partisë Demokratike, Myslim Murrizi ka deklaruar se është situatë katastrofike që vendi të jetë pa opozitë.

Duke iu referuar kaosit në seancën e sotme plenare, ku opozita ktheu përmbys karriget dhe hodhi tymuese në sallë, Murrizi theksoi se Partia Demokratike vijon të thellojë çarjen brenda radhëve të saj.

“Ka ndodhur një problem me atë që është aset, që është opozita. Në një rend formal pluralist siç jemi ne, se demokratik nuk ma zë goja ta them që qeveria të jetë e korruptuar ndodh. Por që vendi të jetë pa opozitë, është katastrofë.

Çarja që ka ndodhur mes Bashës dhe Berishës dhe më pas mes disa deputetëve që u përjashtuan nga Basha, pastaj një pjesë të Bashës përjashtuan njëri-tjetrin dhe sot është një farë amalgame. Kjo është ajo që unë kam folur në forumet ku bëj pjesë”, u shpreh Murrizi në emisionin “3D” në RTSH 1.

Murrizi theksoi se ai nuk sheh asnjë hapësirë për bashkim mes ish-kryeministrit Berisha dhe kryetarit të PD-së Lulzim Basha dhe aradhës së deputetëve që mbështesin këto dy figura politike të së djathtës.

“Nuk jam te ajo pjesë që thonë se këtu e njohim Berishën brenda Parlamentit, 10 metra këtej ku është gardhi i PD-së, nuk i njohim. Bashkim nga pika të ndryshme gjeografike nuk ndodh. Mund të gënjesh njerëz që nuk e kanë stofin politik, dhe nuk përcjellin imazhin e të qenit bashkë”, nënvizoi Murrizi.

Ai shtoi se përplasja fizike në Parlament dhe përfshirja nga kaosi i seancave plenare i intereson si ish-kryeministrit Berisha, ashtu edhe kreut të qeverisë, Edi Rama.

“Asnjëherë nuk më kanë pëlqyer ato që janë jashtë normales dhe qesharakë, qofshin në Parlament apo në rrugë. Ai vend nuk është për të bërë shoë, por më duket se iu intereson të dyja palëve për të qenë i sinqertë”,tha më tej Murrizi.

/a.r