Ministria e Brendshme dhe sektori i Emergjencave njoftojnë sot se operacioni i pastrimit të liqenit të Fierzës ka nisur pranë urës së Drinit të Bardhë në rrethin e Kukësit, e cila është dhe zona që ka ndotjen më të madhe.
Mësohet se në operacion janë angazhuar 18 forca me 3 gomone nga Reparti i Ndërhyrjes së Shpejtë (FNSH) e Shkodrës dhe 12 forca me 3 varka nga Forcat e Armatosura.
Lajmi vjen një ditë pasi u shpall gjendja e emergjencës, ndërsa liqeni i hidrocentralit ndodhet mësohet të jetë në një gjendje alarmi. Sipas specialistëve, përveç mbeturinave të shumta industriale që vijnë nga Kosova dhe nga mbeturinat e qytetit të Kukësit, liqeni i Fierzës ndotet edhe nga lëndë të ndryshme kimike, duke shkaktuar katastrofë ekologjike në këtë liqen,shpjegojnë ekologjistët dhe specialistët e mjedisit.
Ditën e djeshme pas konstatimit se në një pjesë të konsiderueshme të sipërfaqes së liqenit të Fierzës kishte mbetje plastike dhe urbane, u mblodh Komisioni i Planifikimit dhe Përballimit të Emergjencave Civile në rang qarku, për të analizuar dhe identifikuar shkaqet e lindjes së ndotjes mjedisore të liqenit të Fierzës dhe marrjen e masave të nevojshme për pastrimin e tij.
Ndërkohë, për rastin në fjalë ka munguar reagimi i shoqërisë civile dhe ambientalistëve, që e kanë fokusuar aktivitetin e tyre te Liqeni.
Sipërfaqja e Fierzës në Shqipëri është 64 km2, ndërsa gjithsej sipërfaqja po të llogaritim edhe pjesën e liqenit në Kosovë shkon në 71 km2.
Niveli i ujërave është 270 metër mbi nivelin e detit. Thellësia maksimale e tij është 128 metra. Shumë i preferuar është peshku luçiperkë, peshk që rritet vetëm në këtë liqen.
