Kryetari i Bashkisë së Tiranës, Erion Veliaj ka prezantuar sot projektbuxhetin për vitin 2016 për njësitë Administrative të Kasharit dhe Vaqarrit. Në një takim të përbashkët për këto dy zona, Veliaj bëri të ditur se projektbuxheti i vitit të ardhshëm ndahet në dy pjesë: njëra që trajton projektet madhore për bashkinë e Tiranës, dhe pjesa tjetër trajton prioritetet e njësive administrative përkatëse.
“Janë disa projekte që kanë rëndësi për gjithë Tiranën dhe nuk janë specifike për një zonë të caktuar. Ajo që ne kemi propozuar është ta dyfishojmë bulevardin, por jo për sheshe ndërtimesh e pallatesh. Projekti që sot nuk quhet më projekti i Bulevardit të Ri, por projekti i Parkut Qendror sepse propozimi ynë është që disa hektarë të zonës së bulevardit të kthehen në parqe për qytetin”, tha Veliaj. Për sa i përket projekteve të mëdha, kryebashkiaku sqaroi se projektbuxheti parashikon mbështetje financiare për vepra të tilla si Bulevardi i ri, si pjesë e Parkut Qendror të Lumit të Tiranës, Unazën e Vogël, sheshi Skënderbej, Parkut të Liqenit apo Pazari i Ri.
Një tjetër projekt që do ketë impakt mjedisor në kryeqytet, por më së shumti në zonën e Kasharit dhe Vaqarrit, do të jetë ai landfillit të Sharrës. Veliaj ka njoftuar se vitin tjetër do të hapet një tender ndërkombëtar për këtë landfill. “Ne duam që një nga investimet më të mëdha të Bashkisë së Tiranës të jetë Landfilli i Sharrës. Banka Botërore është duke mbyllur planin e fizibilitetit. Pas kësaj do të bëhet një thirrje ndërkombëtare për të hapur një konkurs ndërkombëtar për menaxhimin e mbetjeve”, tha Veliaj.
Gjithashtu, në buxhetin e saj për vitin tjetër bashkia i ka kushtuar një rëndësi të veçantë pastrimit të qytetit. Lidhur me këtë çështje Veliaj u shpreh se do të zbatohet një projekt për të vendosur kosha që i ndajnë mbetjet që në origjinë dhe kazanët do të jenë të paaksesueshëm nga faktorë të jashtëm. “Që t’i japim fund kësaj historie, do të zbatojmë një proces riciklimi, ku mbetjet ndahen me kosha që nuk janë të aksesueshëm, që jo kosha ku çdo njeri mund të futet edhe të nxjerrë gjithë mikrobet jashtë për të kapur një shishe plastike. Sigurisht që projekti do të marrë kohën e tij, por besoj se deri vitin tjetër do të kemi fillimin e një projekti që do të ndryshojë historinë e mbetjeve përfundimisht në zonën tonë”, tha Veliaj.
Ndërkohë, lidhur me investimet konkrete në dy njësitë administrative, bashkia ka parashikuar: për Kasharin, është parashikuar një buxhet prej 250 milionë lekësh, ndërsa për Vaqarrin 80 milionë lekë. Në Kashar parashikohet ndërtimi i një shkolle të re në zonën e Unazës së Re, rikonstruksion i rrugëve Ismail Qemali dhe Abaz Ermenji, Yzberisht, ndërtimi i trotuareve në rrugën Kasëm Shima, dhe Skënderbej, rikonstruksioni i rrugës “Beshku”, fshati Mëzez-Fushë, vazhdimi i punimeve në ndërtimin e bulevardit të Kasharit dhe disa rrugëve të tjera.
