Nga Ben Andoni/
Çështja e CEZ-it po merr drejtimin e duhur alla-shqiptar, që do të thotë ikje drejt hiçit. U bë një zhurmë e jashtëzakonshme për të, u mat koalicioni ekzistues qeverisës, u nxorrën dhëmbët e individëve të ndryshëm, u përpoq të trajtohej nga parlamenti por edhe kjo çështje si të tjerat para saj duketv se ka shkuar në kalenda. Dhe, këtu nuk ka ndonjë habi. Kështu ndodhi me Gërdecin dhe 21 Janarin, për të cilin Pozita e sotme u zotua t’i çonte deri në fund, por edhe për një sërë gjërash, të cilat tashmë janë harruar. Ministrat e qeverisë Berisha dhe ata socialistë para tij, të akuzuar me fakte janë harruar dhe nuk përfunduan në pranga teksa sot vazhdojnë karriera. Kurse hiçi jonë mbetet dhe i gjithë debati dhe vëmendja publike, kaloi nga abuzimi masiv me CEZ, prej privatizimit, sidomos përmes përvetësimit së mbledhjes së borxheve, tek debati sesi po na ndaheshin Rama me Metën dhe vidio-shantazhuese ndaj ish-ministrit.
Argumenti ynë si projeksion dhe një nga shqetësimet e mëdha është karriera dhe sesi filtrohesh deri aty. Dhe, ajo që mund të marrësh në gjykim si rezultat logjik është gati tragjike. Vidio e fundit e ish-ministrit në vazhdën e çështjeve të CEZ-it me menaxhimin e letrave zyrtare në krevat, të bënte të vinte keq jo vetëm se media e paraqiti me një histeri kolektive, por edhe se na tregoi se deriku shkon nepotizmi, por edhe sistemi i kalbur i karrierës. Janë një brez i tërë nëpunësish të tillë që ngritjen e tyre në karrierë e kanë ngritur në këtë sistem. Dhe pos fajit të këtij ministri dhe të dashurës së tij, ajo që ka ngritur shqetësim është edhe një nga plagët e shumta në trupin e shoqërisë shqiptare: mënyra sesi bëhen dhe zgjidhen shumë punë administrative në shoqërinë e sotme. Dhe, ishte kaq e madhe kjo, saqë edhe për një moment e hoqi mëndjen nga çështja e CEZ-it, duke na çuar në procesin që lidhet i gjithë problemi i punësimit, apo masa e këtyre nëpunësve që karrierën e kanë të zgjidhur në këtë mënyrë. E jo se nuk dihet. Këtë e kupton nga katapultimet e frikshme të shumë emrave, që shpesh në historinë tonë të viteve të fundit prodhojnë skandale të tilla në çdo fushë. Por edhe mungesën e sistemeve, ku kjo e karrierës, është nga më shqetësueset për të rinjtë shqiptarë, që nuk pranojnë të zgjedhin mënyra si kjo e vidios. Por hiçi është më i fortë se çdo gjë tjetër dhe karriera është një rrugë tejet e vështirë për shumicën e të rinjve shqiptarë, që s‘pranojnë pjesëmarrje të tilla si kjo në video.
