Nga Bledi Lumani
Komisioni i Venecias, sipas asaj që raportojnë mediet, i ka dhënë të drejtë Ilir Metës për emërimet në Gjykatën Kushtetuese.
Ose më saktë, justifikon qëndrimet e presidentit Meta dhe i jep të drejtë që nuk pranoi betimin e Arta Vorpsit, si e zgjedhur automatikisht në Kushtetuese nga mekanizmi zhbllokues.
Në opinionin e Venecias thuhet se “presidenti e pezulloi procesin në mënyrë të njëanshme, por në mungesë të boshllëkut ligjor që ndodhi me Gjykatën Kushtetuese, mekanizmi zhbllokues nuk do ishte i zbatueshëm.
Është e justifikueshme të pranohet emërimi i mëvonshëm i një kandidati të dytë nga presidenti.
Prandaj duket e arsyeshme që presidenti refuzoi të pranonte betimin e gjyqtares që pretendon se u emërua automatikisht”.
Në lidhje me procedurën e betimit, duke qenë se Vorpsi u betua para një noteri, Komisioni i Venecias thekson se, sipas Kushtetutës së Shqipërisë, betimi para presidentit është i detyrueshëm dhe parakusht për të marrë detyrën.
Ilir Meta reagoi menjëherë, duke thërritur “fitore”.
Ashtu si dhe shpura e tij politiko-mediatike.
Madje Ilir Meta nxorri edhe këshilltarët e tij në Presidencë, të pozonin të gjithë të veshur me një bluzë të bardhë, me mbishkrimin “Venecia”.
Një skenë që të bën për të vjellë, kur kujton se vetëm pak muaj më parë, po këtë “Venecia”, Meta me shpurën e tij e masakruan dhe e cilësuan si të blerë nga Rama, pse argumentoi që presidenti kishte tejkaluar kompetencat kur anulloi zgjedhjet dhe dekretoi një datë tjetër.
Vetë Meta i dërgoi edhe një letër plot akuza e mllef kreut të Komisionit të Venecias, ku i vinte në dukje se ia kishin “futur kot” me argumentet e tyre.
Ndërsa Petrit Vasili, që sot ka dalë dhe tund si të drejtë, opinionin e fundit të “Komisionit të Venecias”, për emërimet në Gjykatën Kushtetuese, atëhere shkruante.
“Në kontrast me këtë realitet shumë të qartë e të faktuar shfaqen qesharake edhe përpjekjet e ndonjë trakti Venecian që mori atributet e një trupe policore dhe që u përpoq mjerueshëm t`i krijonte alibi politikës kriminale të Edi Ramës, duke dalë hapur kundër Sigurisë Publike të Shqipërisë dhe shndërrimit të saj në një shesh civil lufte me pasoja shkatërrimtare”.
Tani nuk dimë kujt Komisioni të Venecias t’i besojmë, atij të tetorit të vitit të shkuar, kur rrëzoi Ilir Metën dhe “pleqtë pensionistë” të Komisionit sulmoheshin ashpër, apo këtij të sotmit (që është i njëjti), që i ka dhënë të drejtë Ilir Metës!
