Dogana e Tiranës bllokoi sot 1920 shishe parfumi 50-mililitërshe të markës “Hugo Boss” të falsifikuara. Këto produkte false kishin destinacion tregun shqiptar. Pas pezullimit të mallit për qarkullim të lirë, Drejtoria për Mbrojtjen e Pronësisë Intelektuale në Drejtorinë e Përgjithshme të Doganës iu drejtua përfaqësuesit ligjor të mbajtësit të së drejtës së Kompanisë “Hugo Boss” për t’u shprehur mbi origjinalitetin e produktit, i cili konfirmoi se kjo sasi parfumesh është e falsifikuar.
Pas kryerjes së të gjithë procedurave konform ligjit, kjo sasi parfumesh do të shkatërrohet nga mbajtësi i së drejtës, nën monitorimin e Degës Doganore Tiranë dhe Drejtorisë për Mbrojtjen e Pronësisë Intelektuale në Drejtorinë e Përgjithshme të Doganës.
Vlera e përafërt e mallit që do të shkatërrohet arrin në 96 000 euro.
Në njoftimin e saj Drejtoria e Përgjithshme e Doganave “fton përdoruesit dhe mbajtësit e së drejtës që të aplikojnë pranë sistemit doganor për mbrojtjen e të drejtave të pronësisë intelektuale”.
BW
