Prej ditësh po qarkullon në mediat e huaja dhe ato vendase lajmi për mundësinë e ngritjes së një kampi me refugjatë nga Lindja e Mesme dhe Afrika, në Shqipëri ose në Kosovë.
Kjo çështje ka sjellë reagimin e ashpër të opozitës. Lidhur me idenë që ka lindur nga Austria dhe Danimarka, ka reaguar edhe Komisioneri për Zgjerimin në BE Johanes Hahn.
Ai ka deklaruar se ky plan nuk mund të realizohet në Ballkan.
“Unë paralajmërova që në valën e parë në vitin 2015 që vendet në rajon që nuk janë anëtare të BE nuk mund të bëhen parking për refugjatët”, deklaroi Hahn.
Kryeministri danez Lars Lokke Rasmussen njoftoi në 5 Maj se qeveria e tij ishte në bisedime me Austrinë e cila do të marrë presidencën e radhës së Bashkimit Evropian, si dhe me vende të tjera.
Ndërkohë kancelari austriak Kurz i pyetur nëse Shqipëria ishte opsion tha: “të shohim”.
Lidhur me këtë lajm, qeveria shqiptare ka mohuar kategorikisht se ka marrë një propozim të tillë apo ka pranuar të ngrihen kampe në vendin tonë.
Vetë kryeministri Rama i ka cilësuar lajmet e përhapura fantazi./a.m.
