Dy persona janë plagosur me armë zjarri gjatë orëve të mbrëmjes në qendër të Kamzës. Ngjarja e rëndë ndodhi pas një konflikti midis dy grupesh. Sipas policisë, të plagosur kanë mbetur shtetasit Klevis Halili dhe Orges Mullai të cilët janë transportuar në spital dhe ndodhen në gjëndje të rëndë shëndetësore për shkak të plumbave të marrë.
Dy të plagosurit janë Klevis Halili i cili ka marrë 3 plumba në trup dhe Orges Mullai, i qëlluar 4 herë në trup. Sipas bluve të Tiranës, autorë të krimit janë shtetasit Alfred Ruçi dhe Amarildo Dushku të cilët janë shpallur në kërkim.
Të rinjtë janë konfliktuar për motive banale. Dy të plagosurit kishin hedhur pranë një lokali në qendër të Kamzës disa fishekzjarre. Kjo ka bërë që Alfred Ruçi dhe Amarildo Dushku, të cilët ishin të armatosur dhe gjendeshin në lokal, të dalin dhe të nisin sherrin mes dy të rinjve. Debati ka degjeneruar në sharje e përplasje fizike, ku Ruçi e Dushku më pas kanë nxjerrë pistoletat duke qëlluar Klevis Halilin dhe Orges Mullain.
