Policia ka arrestuar sot shtetasin Lefter Canaj, i cili akuzohet për vënien e zjarrit një ditë më parë në Spitalin Amerikan, ku humbën jetën nga asfiksia dy gra 55-vjeçare.
Canaj akuzohet për “vrasje në rrethana të tjera cilësuese” dhe “shkatërrim të pronës me zjarr”.
Një ditë më parë humbën jetën në ambientet e spitalit pacientet Sanie Sulaj nga Mamurrasi dhe Hanife Mali nga Laçi, të cilat ishin duke marrë shërbimin në pavionin e hemo-dializës.
Ngjarja e rëndë dhe e paprecedentë ndodhi mesditën e së hënës në brendësi të pavionit teksa pacienti Lefter Canaj, 57 vjeç, ka nxjerrë nga qesja një bidon me benzinë dhe ka spërkatur pacientin tjetër Dashamir Saraçi, 47 vjeç, duke i vënë zjarrin.
Policia dhe Prokuroria e Tiranës kanë sekuestruar si provë të rëndësishme për zbardhjen e ngjarjes pamjet filmike të një prej kamerave të sigurisë së spitalit, që ishte e instaluar pikërisht në vendin ku ndodhi konflikti mes dy pacientëve.
Në pamje duket qartësisht si ka nisur ngjarja, përleshja, tentativa e vrasjes me zjarr dhe ndërhyrja e infermierëve që arritën të shpëtojnë nga vdekja dy protagonistët.
Sipas grupit hetimor që ka administruar provat në vendngjarje, zjarri në spitalin privat është një tentativë vrasjeje e paramenduar nga ana e pacientit Lefter Canaj.
Ai ishte paraqitur dje në mëngjes për të kryer dializën dhe ishte i informuar se aty ndodhej edhe pacienti tjetër, me të cilin ai kishte konflikt, Dashamir Saraçi.
Për këtë arsye Canaj kishte marrë me vete një bidon me lëndë djegëse, benzinë, që e kishte futur në një qese. Grupi hetimor ka verifikuar me detaje pamjet filmike, të regjistruara nga kamera e sigurisë që ndodhej e instaluar në dhomën ku ndodhi ngjarja.
Burimet thanë se aty duket qartësisht që dy pacientët fillimisht kanë debatuar ashpër me njëritjetrin, madje edhe janë përplasur fizikisht. Brenda pak sekondash nga ky moment, Lefter Canaj nxjerr nga qesja që kishte me vete bidonin, i hap tapën dhe e spërkat pacientin tjetër.
Sapo kryen këtë veprim, ai nxjerr nga xhepi shkrepësen dhe i vë flakën pacientit tjetër. Në këtë moment ka pasur një përleshje tjetër mes autorit e të dëmtuarit dhe për pasojë flakët janë përhapur edhe në trupin e 57-vjeçarit Canaj.
Në video duken dy infermierë që ndërhyjnë me shpejtësi, duke ndihmuar dy personat e përfshirë nga flakët. Ata arrijnë të shuajnë zjarrin në trupin e tyre, duke mbetur edhe vetë të lënduar. Por ndërkohë e gjithë dhoma ishte përfshirë nga flakët që u përhapën me shpejtësi edhe për shkak të medikamenteve që ndodheshin aty.
Panorama/d.i.
