Pas deputetit të përjashtuar nga Partia Socialiste Tom Doshi, ka qenë radha e mikut të tij, dhe ish-ministrit të energjitikës Dritan Prifti të kallëzohet në Prokurori për fshehje pasurie.
Sipas njoftimit të ILDKP-së bëhet fjalë për fshehjen e rreth 4.6 milionë eurove pasuri të Dritan Priftit, të cilat janë evidentuar nga kontrolli i ushrtuar.
Kallëzimi i depozituar në Prokurorinë e Tiranës përfshin kontrollin e kryer nga ILDKPKI përgjatë viteve 2003-2013, kohë në të cilën Dritan Prifti ka mbajtur postin e ministrit dhe funksionin e deputetit.
Sipas kallëzimit rezulton se në këtë 10-vjeçar Prifti ka fshehur pasurinë nëpërmjet kontratave fiktive, ndërsa pritet që prokuroria e Tiranës të nisë hetimet pas këtij kallëzimi.
ILDKPKI sqaron se pas kontrolleve të kryera janë krijuar dyshimet se Prifti ka kryer transferta të dyshimta brenda dhe jashtë vendit duke pastruar e fshehur vlerën e 4.6 milion eurove pasuri.
Por kjo nuk është hera e parë që Prifti denoncohet për pasuri të pajustifikuara. Edhe në kohën që ai ishte ministër në qeverinë Berisha u kallëzua si një ndër personat me pasuri të pajustifikuar, kur opozita socialiste sot në qeveri akuzonte se brenda 1 viti Prifti arriti të pasurohej me 1.8 milion euro kur shqiptarët varfëroheshin.
