Gjykata e Shkallës së Parë në Gjirokastër ka vendosur të lërë në burg Lulzim Kullën, të njohur si i ‘forti’ i Shkodrës.
Ai u arrestua në Kakavijë, pasi tentoi që të kalonte në Greqi me një pasaportë të falsifikuar.
Më 24 korrik, nën identitetin Alfons Deda, Kulla po udhëtonte si pasagjer në një automjet tip “Audi” drejt shtetit helen.
Kulla nuk ka bërë rezistencë gjatë momentit të ndalimit. Mbi Kullën, tashmë rëndon akuza e falsifikimit të pasaportës.
42-vjeçari Lulzim Kulla i shpëtoi për mrekulli një atentati të 13 janarit 2018. Në atentat mbetën të plagosur 8 persona, mes tyre dhe vetë Lulzim Kulla.
Nga një operacion i gjerë i Policisë së Elbasanit në bashkëpunim me atë të Shkodrës janë vënë në pranga 7 persona, të cilët u dyshuan si autorët e shpërthimit të fuqishëm me moto-bombë në mes të Shkodrës, ku mbeti i plagosur rëndë, Lulzim Kulla, i cili ishte dhe shënjestra e atentatit.
Nga shpërthimi u dëmtuan disa biznese aty pranë. Në objektin ku iu vendos tritoli, Lul Kulla kishte në pronësi një lokal si dhe disa ambiente të dhëna me qira.
/b.d
