Renaldo Kalari do të drejtojë Partizanin në sfidën me Teutën dhe sot ai ka dalë para mediave për të folur për përballjen e radhës dhe për çështje të tjera. “E kisha menduar të isha këtu një ditë, i kam kushtuar jetën futbollit. Kam dhënë maksimumin si lojtar dhe vjen një moment që duhet të ndalesh. Në atë moment mendon të vazhdosh. E kam bërë me pasion dhe e kam ëndërruar të jem këtu si jam sot, por normalisht në një situatë tjetër, me më shumë vite eksperiencë. Erdhi në një situatë ndryshe. Kam mbështetjen e klubit për këto dy ndeshje dhe do bëj më të mirën të arrijmë objektivat që ka klubi.
“Receta është ajo që dihet në futboll, ajo që e kam pasur edhe si lojtarë: të japim maksimumin në fushë, për veten, klubin, tifozët dhe familjet tona. Ajo luaj me zemër është një fjalë, por që duhet treguar në fushë”.
“Fjala shok nuk ka shkuar kurrë te Partizani. Një humbje ndodh. Logjikisht, të gjithë nuk do ishin mërzitur nëse e humb derbin një herë në gjashtë vjet. Ne kemi objektiva të tjera, që janë vënë që në fillim të sezonit. Duhen arritur. Normalisht gjatë rrugës ka luhatje, por në një klub si Partizani kur ka vështirësi lojtarët janë të përgatitur për të dalë nga kjo situatë. Kemi nga lojtarët më të mirë të kampionatit, në rolet që luajnë”.
“Kur je lojtar mendon vetëm për stërvitjen dhe ikën në shtëpi. Mendon ato që ke bërë mirë dhe që ka bërë gabim. Trajneri mendon për 30 veta, duhet të jetë në mendjet e tyre. Duhet t’i studiojë të gjitha, para dhe pas stërvitjeve. Kështu që është komplet diçka ndryshe”.
Kalari në seancën e parë si zëvendëstrajner
“Nesër pritet reagimi i skuadrës pas dy humbjeve. U bënë shumë vite që Partizani nuk humb dy ndeshje radhazi. Pritet ndryshe mënyra se si do të sillemi në fushën e lojës, sa i takon personalitet. Duhet të sakrifikojmë të gjithë, ata në fushë dhe ata në stol. Kushdo që do futet duhet të japë maksimumin, 40 minuta, 10 minuta, ose edhe një minutë”, shkruan “Abcnews”.
“Ka pasur shumë raste kur një shok skuadre bëhesh trajner. Këta e kuptojnë, i kam të gjithë miq, vëllezër. Brunon që e kam në krah e kam pasur dy vite shok dhome. Në fushë gjërat ndryshojnë për të gjithë. Nuk jam i federuar, por e kam atë pasionin të futem ta ha fushën me dhëmbë. Do mundohem t’ua transmetoj djemve këtë”.
“Të jemi realistë. Unë e kam mbështetjen e të gjithë klubet, por Partizani ka nevojë për një trajner që e njeh ekipin, ka eksperiencë, një trajner me emër. Unë jam këtu si një 16-17 vjeçar që futet në fushë. I takon klubit të vendosë për trajnerin e ri. Nuk mund të jap asnjë opinion. Me Lerdën i kisha marrëdhëniet shumë të mira. Të vjen keq, ndarjet nuk i përballoj mirë. Futbolli matet me rezultate, por është vendimi i klubit. Më vjen keq për të”. /e.s/
