Kadastra e Elbasanit, vendi ku qytetari zgjidh hallin e tij 

Nga ARTUR AJAZI 

Rritja e numrit të vendimeve mbi pronësinë, pritja dhe përcjellja siç duhet ndaj çdo qytetari, mbeten thelbësore në punën e përditshme të drejtueses së Kadastrës së Elbasanit Brixhilda Biçoku. E ardhur në detyrën e drejtueses në muajin Maj, Brixhilda duket se ka vendosur të jetë strikte me orarin dhe rregulloren e institucionit. E rëndësishme mbetet zgjidhja e çdo ankese, si dhe rritja e numrit të vendimeve mbi pronësinë, duke lehtësuar problemin  dhe hallin e qytetarit- shprehet Brixhilda. Ajo është një vajzë e re, me ambicje për të punuar, dhe sedër për ta drejtuar sa më mirë institucionin e Kadastrës së Elbasanit. Duke qenë një prej qarqeve të mëdha në shkallë vendi, Kadastra e Elbasanit mbetet me ngarkesë të madhe pune, lidhur me vendimet e pronësisë, si dhe legalizimin e objekteve pa leje. Ka akoma probleme të mbartura ndër vite, që Brixhilda dhe stafi i saj i kompletuar, kanë nisur ti japin zgjidhje. Rradhët e gjata në derën e institucionit, kanë marrë fund, ashtu siç kanë marrë fund edhe ankesat e qytetarit-shprehet Brixhilda. Agjencia Shtetërore e Kadastrës është institucion në varësi të Kryeministrit, e krijuar në zbatim të ligjit nr. 111/2018 “Për kadastrën”, i cili ka për objekt krijimin dhe regjistrimin e titujve të pronësisë, të dhënë sipas akteve ligjore e nënligjore për pronësinë. Pronësia, lloji i pasurisë, si dhe kufijtë e çdo pasurie, dokumentohen mbi bazë të aktit të fitimit të pronësisë, sipas përcaktimeve të nenit 193 të Kodit Civil. Dega e Kadastrës së Elbasanit, duke rritur numrin e vendimeve mbi pronësinë ndaj qytetarit, veç sheshimit të problematikave të akumuluara, ka rritur ndjeshëm edhe të ardhurat në arkën e shtetit. Nën moton “dëgjo qytetarin, shëno ankesën e tij, kontrollo e saktëso dokumentacionin , pastaj regjistro pronën”, stafi i kompletuar me specialistë të fushave, e ka kthyer tanimë Kadastrën e Elbasanit në institucion ku zvarritja apo dhe vese të tjera, i kanë mbetur së kaluarës. Brixhilda shprehet se “askujt nuk i lejohet të shkelë ligjin, askujt nuk i lejohet të zvarrisë qëllimisht procesin  regjistrimit të pronës së qytetarit, dhe askush nuk tolerohet të bëjë pazare me vendimin e pronësisë”. Nga ana e tyre, qytetarët shprehen të lumtur, pasi kanë gjetur tek drejtuesja e re e Kadastrës Brixhilda Biçoku, njeriun e duhur, drejtuesen e aftë, që i ka dhënë zgjidhje problemit të pronësisë, që kishte vite që i mundonte. Aspak nuk është e vështirë të punosh dhe kontribosh për mbarëvajtjen e punës, aspak nuk është e pamundur të gjendesh dhe ti japësh zgjidhje problemit të çdo qyyetari, mjafton dëshira, vullneti dhe këmbëngulja për të zbatuar ligjin, për të ruajtur pastërtinë morale të institucionit dhe zyrtarit të shtetit.