Ende pa u mbyllur jehona për ngjarjen e Bularatit, dalin të tjera detaje mbi të shkuarën e Konstantin Kacifës, i vrarë të dielën gjatë një shkëmbimi zjarri me forcat e policisë.
35-vjeçari, i divorcuar me një fëmijë, anëtar i “Agimit të Artë” dhe forcave ushtarake të Greqisë, në fakt njihej për prirjet e tij ekstreme.
Në profilin e tij në “Facebook”, në javën përpara se të mbetej i vrarë pasi qëlloi me kallashnikov ndaj forcave RENEA, Kacifa kishte publikuar një numër fotosh dhe statusesh radikale.
Në njërën prej tyre, ai kishte vendosur një numër armësh luftarake, midis tyre një kallashnikov dhe disa karikatorë të mbushur, mbi flamurin e Verio Epirit, duke thënë se ishte i gatshëm të vdiste për Greqinë e Madhe.
Në të tjerë postime, ai tregonte veten se si vendoste në fshatrat e jugut flamunj provokues të Vorio Epirit, ndërsa në një tjetër postim, publikonte një hartë të Greqisë së Madhe, e cila përfshinte midis të tjerash, edhe Korçën, Gjirokastrën, Përmetin, Sarandën e deri në Vlorë.
Në këtë postim, Kafcifa shkruante se “Grekët janë racë e shenjtë”, e se me doemos, duhet të çliroheshin këto qytete greke nga “barbarët”.
Ndërkohë, vrasja e tij nga forcat policore vazhdon të jetë një objekt debati midis dy shteteve tona.
Ministria e Jashtme e Greqisë dënoi ngjarjen, ndërsa kërkon një hetim të plotë për vrasjen e “pajustifikuar” të 35-vjeçarit.
Ndërkohë, shteti shqiptar është përgjigjur me një notë diplomatike, në të cilën dënon ashpër qëndrimin e Athinës Zyrtare, duke thënë se “tentativa për të politizuar këtë ngjarje është e turpshme”.
