Gazetari investigativ Artan Hoxha, duke komentuar në emisionin “Të Paekspozuarit” në MCN TV, seancën e parë të gjyqit ndaj ish-presidentit Ilir Meta, u shpreh kundër mbajtjes së të pandehurve në kafaz qelqi. Ai u shpreh se kjo që ndodh në gjyqet e Prokurorisë së Posaçme nuk ndodh në asnjë vend, madje as në Kosovë ku ditët e fundit u bënë seancat për të pandehur që u dënuan me burgime të përjetshme.
“Kam mbuluar çështjet e dretjësië, nuk kemi patur kafaze derisa u krijua prokuroria dhe Gjykata e Krimeve të Rënda. U bënë kafaze të hekurta. Kur u krijua SPAK u vendos kafaz me xham. Gjatë kësaj vere iu bë rikonstruksion godinës ku është gjykata dhe kjo është salla numër 1, ka xhama të blinduar.
Në proceset e mëparshme, politikanët nuk kanë qenë në kafaz. Por që kur ka filluar SPAK, nga Koka, Bllako, Veliaj, të gjithë i kanë futur në kafaz. A duhet të jenë në kafaz? Unë mendoj se jo, sepse nuk përbën rrezikshmëri. Brenda kafazit ka problem komunikimi, është vështirë që ai të dëgjojë gjyqtarët.
Në të mirë të procesit është që të ketë avokatin në krah. Gjykata sot është shumë e sigurt.
Në Itali ishte proces me mafia, ishte salla bunker. Kosova nuk ka kafaz, nuk e aplikon. Në proceset që kam qenë, përfshirë edhe të fundit dënimi me burgim të përjetshëm. Madje edhe për autorët e sulmeve në Banjskë, nuk kanë qenë në kafaz. Çështja është vendim gjykate, gjykata mund ta vendosë në krah të avokatit, e kanë vendosur në këtë formë.
Transmetimi live, ajo që ndodhi sot më mirë mos transmetohej. Nuk u hap seanca pasi nuk merrte pjesë Fatime Kryemadhi dhe as avokati i saj. SPAK dhe GJKKO nuk kanë lejuar asnjë kamera brenda.
Nëse gjykata do ta gjykojë të transmetohet live, siç i bën GJK. Kjo forma që transmetohet vetëm fillimi, e ka dëmtuar Metën, merreshin të gjithë me pamjen e Metës”- tha gazetari Artan Hoxha.
