Një pikë në kontratën e Gonzalo Higuain me Napolin i kursen rreth pesë milionë euro Juventusit. Klubi kampion i Italisë ka rënë tashmë dakord me lojtarin dhe, meqënëse Napoli nuk dëshironte të hynte në diskutime, është detyruar të paguajë klauzolën e lirimit të parashikuar në kontratë, me vlerë 94 milionë e 736 mijë euro.
Por sot është bërë i ditur një detaj i ri i kontratës, i cili parashikonte që kjo shifër do të paguhej nga vetë lojtari nëse do të dëshironte të prishte në mënyrë të njëanshme marrëveshjen. Ndërsa, në rastin se është një klub tjetër që paguan për të marrë lojtarin, shifra e lirimit nga Napoli është 90 milionë euro.
Sigurisht që mbetet një shifër marramendëse për t’u paguar, megjithatë ulja është e mirëpritur nga bardhezinjtë.
Ndërkaq, Napoli është hedhur menjëherë në kërkim të një sulmuesi tjetër dhe objektivi është përsëri argjentinas, Mauro Icardi i Interit, për të cilin ofron 40 milionë euro.
Efekti domino vazhdon, me Interin që tashmë hedh sytë nga Mario Gomez për të zëvendësuar kapitenin.
d.i.
