Jetë mes dhunës, ankthit dhe frikës ka jetuar një familje në Tiranë për shkak të dhunës së përsëritur të kryefamiljarit, i cili torturonte bashkëshorten për motive nga më banalet. Dhunës së pamëshirshme, kërcënimeve dhe presionit nuk i kanë shpëtuar as fëmijët të cilët përpiqeshin të shpëtonin nënën nga dhuna e babait. Bëhet fjalë për 46-vjeçarin D.K. i cili është arrestuar për dhunë në familje. Para se ky shtetas të denoncohej nga bashkëshortja dhe fëmijët, ai ka ushtruar presion psikologjik, duke i’u drejtuar fëmijëve se “do t’i mbyste nëse shkonin në polici”, dhe se në shtëpi “do të bëhej siç thoshte ai”. Shkaqet e konflikteve mes tij e bashkëshortes ishin për xhelozi por edhe për motiuve tepër banale. Në një rast, bashkëshortja e tij ka rrëfyer se e rrahu vetëm se nuk i pëlqente gatimi. E gjithë ngjarja rrëfehet edhe nga dy fëmijët më të mëdhenj të çiftit, të cilët madje thonë para hetuesve se u kërcënuan të mos i dilnin në mbrojtje nënës, dhe të mos shkonin të denonconin në polici.
Ngjarjet e dhunshme
Nga shqyrtimi i dosjes rezulton se shtetasi D.K. një prej pasditeve kur kthehej në shtëpi, në nëntor të vitit të shkuar, ka filluar të debatojë me fëmijët e tij, duke iu shprehur se në shtëpi do të bëhet siç thotë ai dhe nëse do të shkojnë në polici, do t’i mbysë. E dëmtuara u ka dalë në mbrojtje fëmijëve dhe ai në këtë moment e ka kapur prej flokësh, i ka vendosur duart në fyt dhe gjuajtur me grushta në kokë. Fëmijët më të rritur Doriani dhe Irena janë munduar ta pengojnë por ai ka vazhduar të ushtojë dhunë.
E njëjta situatë ka ndodhur edhe disa ditë më vonë, kur i pandehuri sapo kishte mbërritur në banesë dhe ka filluar të hajë darkë. Ai është shprehur se nuk i pëlqente gatimi dhe ka hedhur tenxheren në tokë, duke përmbysur dhe thyer sendet mbi tavolinë dhe orenditë shtëpiake. Këto veprime i ka shoqëruar me fjalë fyese. Më pas ka dalë në verandën e banesës dhe ka komunikuar në telefon. Sapo ka hyrë brenda, ka filluar ta gjuajë me grushta në kokë dhe trup, duke i kërkuar që të largohej nga banesa. Ajo i është përgjigjur se nëse vazhdonte në këtë mënyrë, do të njoftonte policinë. I pandehuri i është shprehur se edhe nëse hynte në burg, kur të dilte prej andej do ta vriste. Në këto kushte e dëmtuara ka njoftuar policinë dhe paraqitur kallëzim penal.
Vajza rrëfen dhunën e babait
Shtetësja I. K. në cilësinë e personit që tregon rrethana të hetimit, ka theksuar se prindrit e saj kanë patur gjithnjë probleme, për arsye xhelozie, pune etj. I ati Dritan ushtron dhunë fizike vazhdimisht mbi nënën. Në thuajse të gjitha rastet ajo dhe vëllai Dorjan kanë qenë të pranishëm. Ditën e ngjarjes kanë debatuar me të atin, pasi ai nuk ka patur dëshirë që Irena të dilte me gjyshen e saj. Ndonëse e ka lejuar, më pas i ka bërtitur. Për këtë arsye, ka ndaluar edhe nënën të takojë të afërmit e saj. Gjatë këtij debati e ka gjuajtur me shpulla dhe dhunuar fizikisht. Ajo dhe vëllai janë munduar t’i ndajnë. Ajo thekson se babai çdo ditë ka ushtruar dhunë fizike ndaj nënës. Edhe më parë e ka kryer këtë veprim dhe nëna ka patur shenja dhune, por nuk e ka denoncuar dhe ka sakrifikuar, për shkak që të mos linte ata si femijë të rriteshin pa praninë e të atit.
Dëshmia e djalit
Djali i çiftit D. K., në deklarimet e tij ka pohuar faktin se babai ka gjuajtur nënën me shpullë, por sipas tij kjo e fundit ka qenë ajo që e ka provokuar disa ditë rresht.
Në deklarimet e tij, shtetasi i pandehuri pranon të ketë patur debate e zënka me bashkëshorten dhe femijët, pasi u kërkon të mos dalin nëpër lagje por të bëjnë ndonjë punë. Ai mohon të ketë keqtrajtuar atë dhe sipas tij këto janë trillime të bashkëshortes.
