Rusia dhe Shtetet e Bashkuara kanë rënë dakord në lidhje me disa çështje, në mënyrë të veçantë ato që kanë të bëjnë me Sirinë. Kjo është pohuar nga sekretari amerikan i Shtetit, John Kerry dhe ministri i Jashtëm rus, Sergei Lavrov, pas takimit të tyre në Moskë.
“SHBA’të janë të gatshme të bashkëpunojnë me Moskën”, u ka thënë Kerry gazetarëve në përfundim të takimit me presidentin rus Putin dhe ministrin e Jashtëm, Lavrov.
Ai theksoi se kanë pasur një ditë produktive dhe diskutimet kanë qenë konstruktive.
Para takimit zyrtar, Kerry është kapur nga kamerat teksa shijonte qendrën e Moskës si një turist i thjeshtë, duke blerë suvenire. Një grup vendasish i janë afruar për ta përshëndetur. Mes tyre, një djalë i vogël e ka pyetur se çfarë do të donte t’u uronte rusëve. Por vështirësia e djaloshit për t’u shprehur saktë në anglisht e ka bërë Kerry-n të pyesë disa herë për atë që po i kërkohej të thoshte. “Më fal, anglishtja ime mund të mos jetë dhe aq e mirë”, i thotë djali.
“Sigurisht që është shumë më e mirë se rusishtja ime”, i përgjigjet Kerry.
“Dëshiroj që populli rus dhe ai amerikan të jenë miq të mirë dhe vendet tona të ecin krah njëri-tjetrit në paqe”, ka thënë Kerry pasi ka kuptuar pyetjen.
