Kryeministri Edi Rama, gjatë ceremonisë së 65-vjetorit të Universitetit të Tiranës, deklaroi se “për të pasur më shumë cilësi, duhet të mendojmë seriozisht për një reformë të thellë dhe për një sinergji të re me qendër graviteti Universitetin e Tiranës”.
Kreu i qeverisë e nisi me një batutë: “Jetojmë në një botë të çuditshme. Ky është universiteti i parë i vendit dhe feston 65-vjetorin, por para disa ditësh unë isha në 70-vjetorin e Universitetit të Mjekësisë, që nuk është i vetmi që feston 70-vjetorin sepse shikoj ftesat që më vijnë. Pra, ky është universiteti i parë, por njëkohësisht edhe më i riu”.
Më tej, Rama theksoi se duhet menduar seriozisht për një reformë të thellë.
“Mendoj që kemi shumë universitete dhe për të pasur më shumë cilësi, duhet të mendojmë seriozisht për një reformë të thellë dhe për një sinergji të re me qendër graviteti Universitetin e Tiranës. Duhet të mendojmë seriozisht për rankimin në arenën ndërkombëtare dhe për këtë duhet të shikojmë në mënyrë praktike që të plotësojmë kushte të thjeshta teknike. Për shembull, UT nuk rankohet dot siç duhet, pasi i mungon mjekësia”, tha Rama.
Në lidhje me pagat, kreu i qeverisë tha: “U bë rritja e nevojshme e pagave dhe ndërkohë po përgatitemi që të shikojmë disa përfundime të një raporti mbi situatën aktuale dhe mbi ku duam që të shkojë universiteti në vitin 2030”.
/a.r
