Një dimension i ri i jetës së Mimi Kodhelit është ai si gjyshe. Prej 2 vitesh, në shtëpinë e tyre është shtuar Aleksi i cili ka sjellë një gëzim të jashtëzakonshëm. Si rrallëherë, Mimi Kodheli gjendet në një vështirësi për të gjetur fjalët e duhura për të përshkruar këtë ndjesi në programin “Rudina” në Tv Klan.
Mimi Kodheli: Oratoria nuk më mungon por nuk do t’i gjeja kurrë fjalët për ta përshkruar dashurinë për nipin. Është një emocion…Ka dy gjëra që e bëjnë momentin më të ndjerë. E para, mosha kalon dhe ti bëhesh më i ndjeshëm, më i dobët në kuptimin e dashur të fjalës. Ndërkohë që ai është një krijesë që duket, thua nga erdhi, kush e solli, çfarë është kjo bukuri, çfarë është kjo dashuri e jashtëzakonshme? Është i bukur kur të thërret, është i bukur kur është indiferent, të duket sikur është krijesa më e bukur në botë, të duket ikur është bebi më inteligjent, i duket të gjithëve kështu se të gjithë që janë bërë gjyshër e kanë jetuar këtë fazë, pastaj ke këtë luksin që nuk ke atë stërmundimin e rrijtjes së fëmijës siç e ke pasur dikur kur ke lindur vetë, e shijon. Është një dashuri, më duhet ta falënderoj Zotin çdo ditë që më ka dhënë mundësinë të jem edhe gjyshe.
