Situatën problematike në rrugët e vendit ka vënë në alarm drejtuesit më të lartë të policisë rrugore. Kreu i saj Mit’hat Tola pranoi në studion e MCN se shifrat janë shqetësuese dhe se një pjesë e madhe e përgjegjësisë është e drejtuesve të automjeteve për mënyrën si ata janë pajisur me leje drejtimi nga Autoshkollat.
“Jo të 1 milionë njerëzit që kanë leje drejtimi në Shqipëri janë profesionistë. Shkeljet tek ne janë shumë të madha dhe kjo do të thotë se drejtuesit e mjeteve nuk kanë dalë të formuar. Autoshkollat nuk duhet të merren vetëm me tabelat. Shqipëria ka miliona njerëz të cilët drejtojnë automjete dhe ata që përfshihen në aksidente janë rreth 1000”, tha Tola.
Për 20-vjecarin që shkaktoi aksidentin me 4 viktima Tola tha se ai ishte identifikuar nga policia me parë dhe figuronte si shkelës i rregullave të qarkullimit, në disa raste për tejkalim shpejtësie. Sipas Tolës, shpesh herë në të tilla raste ato që kanë çeduar janë hallkat e drejtësisë.
“Ai ishte identifikuar nga policia dhe kishte 8 gjoba, ka qenë i ndëshkuar dhe ka pasur edhe gjobë për tejkalim shpejtësie. Nëse e konsiderojmë të fortë ne mund të bëjmë bashkë një bast dhe nëse gjeni të fortë që nuk kanë marrë gjoba.
Policia rrugore është një trupë që ndëshkon dhe në momentin që përfshiheni në aksident policia shkon, këqyr dhe shikon rrethanat e aksidentit dhe çohet në dyert e gjykatës. Jemi vendi që ndëshkojmë më shumë në Europë”, u shpreh ai.
Kreu i policisë njoftoi futjen në përdorim të dronëve dhe radarëve të rinj, por ajo që mund ta vështirësojë këtë monitorim është sistemi i adresave.
Tola po ashtu tha se së shpejti do të dalin lejet e reja të qarkullimit të përshtatur sipas standardeve të Bashkimit Europian. Ai shtoi theksoi se me hyrjen në fuqi të ndryshimeve në Kodin rrugor, gjobat për tejkalim shpejtësi, parakalim të gabuar apo përdorim celulari do të jenë trefishi i atyre aktuale.
g.kosovari
Jeni si nuk jeni