Institucioni i Avokatit të Popullit ka identifikuar një problematikë që lidhet me rastet e dhunës ndaj protestuesve brenda ambienteve të policisë. Kështu u shpreh këtë të premte Erinda Ballanca në studion e emisionit “Java në RTSH” me analistët Preç Zogaj e Lorenc Vangjeli.
Ballanca u shpreh se është e qartë që kjo lloj problematike nuk është adresuar në formën e duhur dhe rezultatet e hetimeve kanë qenë zhgënjyese.
“Këto rezultate kanë qenë zhgënjyese jo vetëm për Avokatin e Popullit, por edhe për Komitetin e Parandalimit të Torturës, që vjen një herë në katër vite në Shqipëri. Ata thonë të njëjtin gjë që ka shumë pak adresim për rastet kur policia ka ushtruar dhunë. Por që gjithashtu ka edhe rritje të cilësisë së mënyrë sesi Policia qaset”.
Ajo u shpreh se Policia vijon të mbetet e dhunshme në raport me protestat.
“Kemi hasur veprime shumë të padrejta dhe të pakuptimta për adoleshentë që janë rrahur në mënyrë shtazore vetëm pse kanë thyer orën policore. Apo gjatë arrestimit të një personi ku efektivët burrërohen dhe nisin e fyejnë. Këto veprime nuk janë adresuar nga ana e SHÇBA apo Prokuroria. Madje ka hetime të tejzgjatura” – u thpreh Ballanca ne studion e “Java në RTSH”.
Avokatja e Popullit tha se nëse Policia ka ushtruar dhunë, ajo duhet hetuar bashkë me personin e arrestuar. Ajo shtoi se shqetesuese është mënyra sesi duhet adresuar problematika e të miturve.
“Ne duhet ta kuptojmë zemrëimin e të miturve në protestë pasi përndryshe nuk kemi si t’I ndihmojmë. Qoftë edhe nëse ata janë paguar, ne duhet të kuptojmë se cila është kjo arsye që ë miturit rrezikojnë jetët e tyre në këmbim të parave. Pavarësisht se ne s’kemi prova për këto pretendime” – tha Avokati i Popullit, Erinda Ballanca.
https://www.youtube.com/watch?v=sj46rQclU10
