Pas përfundimit të seancës së sotme plenare, kryedemokrati Sali Berisha iu bashkua protestuesve të thirrur para Parlamentit.
Sipas Berishës, “Rama shënoi fundin e tij politik”, nga votimi i bërë sot në Kuvend për çështjen Balluku.
“Të dashur miq,
Sot, Edi Rama, kreu i organizatës kriminale, shënoi vetëvrasjen e tij politike. Shënoi fundin e tij politik.
Firmosi të drejtën e shqiptarëve për ta nxjerrë me të gjitha mjetet nga pushteti i tij i krimit.
Sot, ai nuk votoi për Lubi Ballukun. Votoi për veten e tij. Për të mbrojtur vjedhjet që ka bërë, krimet e shëmtuara që ka kryer.
Në historinë kombëtare nuk ka pasur njeri me standardet më të ulëta njerëzore se ky njeri“, u shpreh ai.
Berisha falenderoi protestuesit e ardhur, teksa vijoi me akuzat ndaj kreut të qeverisë.
“Por theksoj sërish se është puna juaj, është qëndresa juaj, është protesta juaj, kryengritja juaj që bëri që sot ai të dalë para mbarë shqiptarëve si qeveritari më i poshtëruar në historinë kombëtare. Si qeveritari më i poshtëruar në Europë. Nuk ka sot një qeveritar në Europë që të bëjë ligje, që të votojë për mbrojtjen e vjedhjeve të tij siç bëri Edi Rama. Nuk ka një qeveritar tjetër në Europë që të ketë firmosur në dhjetëra dhe qindra herë vjedhjen e pasurive të qytetarëve shqiptarë dhe fondeve të tyre. Nuk ka një qeveritar tjetër në Europë, që për të mbrojtur krimet e tij, të mbyllë dyert e procesit të integrimit për qytetarët shqiptarë“, tha ai.
Kujtojmë se me 82 vota kundër, Kuvendi rrëzoi kërkesën e Prokurorisë së Posaçme AntiKorrupsion për heqjen e imunitetit të deputetes. Kështu, nuk u autorizua masa shtrënguese ndaj saj, “arrest me burg” ose “arrest në shtëpi”.
