Jared Kushner, 44 vjeç, bashkëshorti i Ivanka Trump, është një nga arkitektët e marrëveshjes mes Hamasit dhe Izraelit. I konsideruar si krahu i djathtë apo “bashkëpilot” (sipas interpretimeve) i Steve Witkoff-it, të dërguarit special të Trump për Lindjen e Mesme, Kushner nuk ka një rol zyrtar në administratë. Megjithatë, që kur ai u përfshi në proces, negociatat kanë marrë hov.
Gjatë administratës së parë të Trump, ai kishte rolin e këshilltarit dhe punoi për tre vjet e gjysmë për të finalizuar Marrëveshjet e Abrahamit, që hapën rrugën për normalizimin e marrëdhënieve mes shteteve sunnite dhe Izraelit. Plani i tij është zgjerimi i këtyre marrëveshjeve, duke përfshirë vende të tjera, veçanërisht Arabinë Saudite, dhe projekti me 20 pika i Donald Trump-it është në fakt parathënia e këtij vizioni: Gaza e deradikalizuar, pa Hamas, e rindërtuar si hapi i parë drejt stabilitetit dhe bashkëjetesës.
Nga rrethi Witkoff-Kushner është bërë e ditur se ata do të qëndrojnë në rajon deri në ardhjen e Trump. Ky është aktualisht sinjali më konkret që Washington-i po mendon për një mision presidencial në rajon në fillim të javës së ardhshme.
Kushner nuk ka dhënë detaje për angazhimet e tij të ardhshme, por sipas një zyrtari amerikan, ai ka bërë shaka me Witkoff-in, duke thënë se duhet të kthehet në Florida para se Ivanka “t’i ndryshojë bravën e derës”.
Nga Shtëpia e Bardhë flitet vetëm për një angazhim, duke iu referuar misionit në Lindjen e Mesme, por kjo nuk do të thotë se ka përfunduar. Edhe pse nuk do të jetë Kushner ai që do të udhëheqë fazën e dytë të negociatave, kjo do t’u takojë ekspertëve teknikë.
Megjithatë, Kushner ka sjellë një rrjet të gjerë kontaktesh, njohjesh dhe marrëdhëniesh që pak njerëz në botë i kanë kur bëhet fjalë për Lindjen e Mesme. Një rrjet i ndërlidhur me biznesin dhe aktivitetin e tij në investimet private. Kompania e tij, Affinity Partner, është pothuajse tërësisht e financuar, sipas New York Times, nga investitorë të huaj dhe “ka marrë fonde nga fondet sovrane të Arabisë Saudite, Katarit dhe Emirateve”. Rastësi apo jo, këto janë vendet e para ku Donald Trump zhvilloi misionin e tij të parë jashtë vendit në maj të vitit 2025.
Kushner mbetet një aset për administratën. Për Trump-in, ai është këshilltari kryesor, kështu ka deklaruar Steve Bannon për Playbook të Politico. Marrëveshja e së mërkurës është fryt i punës së mëparshme dhe ende aktive të Marrëveshjeve të Abrahamit, edhe pse temat dhe urgjenca janë krejt të ndryshme: tani bëhet fjalë për mbylljen e një lufte dhe ndërtimin e së ardhmes, ndërsa në vitet 2019–2020, planet e partneritetit kishin në fokus biznesin dhe përfitimin reciprok afatmesëm dhe afatgjatë.
Kushner vetë nuk e ka përjashtuar mundësinë që të përfshihet në negociata apo dosje politike nëse “vjehrri-president” do të ketë nevojë. Agjenda e tij e kontakteve ka qenë e vlefshme edhe për Bidenin, ekipi i ish-presidentit demokrat e ka kontaktuar disa herë. Megjithatë, pjesëmarrja e tij direkte apo më aktive nuk është konkretizuar kurrë.
Shkrim nga La Stampa
