Yamato Tanooka, djali 7-vjeçar japonez që qëndroi në pyje për gjashtë ditë, ka dalë nga spitali, ku u mbajt për t’i paraprirë çdo problemi të mundshëm, pavarësisht se ishte në gjendje shumë të mirë shëndetësore.
Takayuki Tanooka, 44 vjeç, bashkë me gruan, e lanë Yamaton anës rrugës në ishullin verior Hokkaido, më 28 maj, si ndëshkim që gjuante me gurë njerëzit dhe makinat.
Kur ata u kthyen për ta marrë, djali kishte ikur. Menjëherë nisi kërkimi, deri sa u gjet në një bazë ushtarake të premten e kaluar.
I ati tha në një intervistë se Yamato e kishte falur.
“I thashë “babi të bëri të kalosh një kohë shumë të vështirë. Më vjen shumë keq”. Atëherë im bir u përgjigj “je baba i mirë, të kam falur””.
Djali u gjet në një barakë ushtarake rreth 5.5 kilometra larg vendit ku e lanë prindërit, në një zonë me pyje të dendur dhe me arinj.
Ai tha se e kishte humbur drejtimin për shkak të të qarave dhe kishte ecur për rreth pesë orë para se të mbërrinte në barakën ku u gjet, sipas gazetës Mainichi.
Atje fjeti midis dy dyshekëve dhe nuk takoi asnjeri.
Djaloi tregoi se kishte pirë ujë nga një çezmë në zonën ushtarake, por nuk kishte ngrënë asgjë për gjashtë ditë.
Kur u gjet, Yamato ishte paksa i dehidratuar, i paushqyer dhe kishte të gërvishtura në krahë e këmbë, por përveç këtyre nuk pati asnjë problem tjetër.
Policia ka bërë të ditur se nuk do të ngrejë akuza ndaj prindërve.
BBC/d.i.
