Kryetari i Partisë Demokratike, Lulzim Basha po luan me një tjetër taktikë, në mënyrë që të qëndrojë sa më shumë në krye te Bashkisë së Tiranës.
Edhe pse Tirana ishte ndër bashkitë e para që mbaroi numërimin e votave për kryebashiak dhe anëtarë të këshillit, Erion Veliaj duhet të presë edhe disa javë për të hyrë në zyrën që ende mban Basha.
KQZ-ja, gjatë mbledhjes së djeshme shqyrtoi kërkesën e Partisë Konservatore të Shqipërisë për këshillin bashkiak të Tiranës dhe e rrëzoi atë. “KQZ mori në shqyrtim Projekt vendimin, “Për shqyrtimin e kërkesës ankimore nr.114 të paraqitur nga Partia Konservatore e Shqipërisë me objekt, “Ndryshimin e tabelës përmbledhëse të rezultatit, për këshillin e bashkisë Tiranë, duke përfshirë në të, rezultatin e dalë nga rinumërimi dhe rivlerësimi i votave të pavlefshme dhe të kontestuara të QV–ve të KZAZ-së nr.32 dhe nr.40, njësia zgjedhore bashkia Tiranë. KQZ vendosi rrëzimin e kërkesës ankimore”, deklaroi KQZ-ja.
Për të ushtruar detyrën e kryebashkiakut të ri të kryeqytetit, Erion Veliaj duhet të bëjë betimin në Këshillin Bashkiak, por, kjo procedurë duket se do të shtyhet edhe për disa kohë nëse Partia Konservatore vendos që pas KQZsë çështjen ta çojë për ankimim në Kolegjin Zgjedhor.
Partia Konservatore ankimoi në Komisionin Qendror të Zgjedhjeve, rezultatin e Këshillit Bashkiak, duke “bllokuar” mbledhjen e parë që ishte planifikuar të bëhej këtë javë. Sipas ankesës së paraqitur në KQZ nga konservatorët, ka pasur tjetërsim votash në disa kuti për anëtarët e këshillit. KQZ-ja vendosi rrëzimin e ankesës dhe tashmë pritet që Partia Konservatore t’i drejtohet Kolegjit Zgjedhor dhe nëse ndodh kjo gjë atëhere deri në vendimin e Kolegjit do të vonohet betimi i Veliajt si kryebashkiak. Por pavarësisht kësaj çështja mbetet ende e bllokuar, pasi në bazë të ligjit, KQZ duhet të presë edhe 5 ditë të tjera për fazën e ankimimit nga subjektet zgjedhore në Kolegj Zgjedhor.
Kryetari i ri i bashkisë e merr detyrën vetëm pasi betohet para këshillit të ri bashkiak. Ndaj nga përllogaritja e afateve, Veliaj nuk do mund të futet në bashki të paktën deri para javës së parë të gushtit.
