Nga Mentor Kikia
Ndërsa na duhet të plotësojmë legjislacionin, u referohemi kryesisht praktikave perëndimore, duke i bërë copy paste, ose përshtatur. Ndodh që shkojmë edhe deri në Kili apo Brazil, për të gjetur ndonjë praktikë arsimore e ta sjellim në Shqipëri.
Por, për luftën ndaj korrupsionit, ja ku është një shembull që vjen nga një republike afrikane, Tanzania. Presidenti i këtij vendi shkarkoi gjithë drejtuesit e administratës së korruptuar të vendit. Nxorri madje edhe një dekret që ndaloi festimin e ditës së pavarësisë, pasi kishte kosto. Të gjitha këto shpenzime i çoi në sektorin e arsimit për luftën kundër kolerës.
Reduktoi numrin e ministrave, nga tridhjetë në nëntëmbëdhjetë. Të gjithë krerët e ministrive duhej të deklaronin llogaritë e tyre bankare dhe pronat. Çdo ministër që fshihte pasurinë largohej menjëherë. Ai ua ndaloi udhëtimet jashtë vendit të gjithë zyrtarëve, veçse me një leje të firmosur nga ai vetë, pasi besonte se këta, në vend të udhëtimeve, duhej të fokusoheshin tek punët dhe problemet e brendshme. Edhe zyrtarët që e kishin të dosmosdoshëm udhëtimin, ua ndaloi të përdorin klasin e parë në avionë.
Për kontrast: Ne, një vend edhe më i rraskapitur se Tanzania, qeverisemi nga pashallarë. Ministra e deputetë, që përveçse posedojnë miliona Euro(të deklaruara, ta padeklaruarat i dinë vetëm ata), marrin edhe ndihmë nga shteti, i cili u paguan qeratë e shtëpive në Tiranë. Ne bëjmë një ligj për vettingtun e policëve, por këtij ligji nuk i nënshtrohet vetë ministri. Bëjmë një ligj për vettingun e njerëzve të drejtësisë, por nuk kontrollojmë politikanët.
Shumë e thjeshtë është: Askush nuk mund të kandidojë për deputet nëse nuk deklaron dhe justifikon pasurinë. Dhe ja ku u pastrua parlamenti.
