“Kur themi Mario Kempes, kujtojmë sulmuesin e Argjentinës. Kampionin e Botës në vitin 1978. Kujtojmë gjithashtu edhe golat e shënuar me skuadrën e Valencias, së cilës i dhuroi një Kupë Europe. Një sulmues me flokë të gjatë, i cili kishte aftësi të shënonte nga çdo pozicion, me të dyja këmbët dhe me çdo pjesë tjetër trupi. Kishte teknikë individuale të zakonshme.
Në fushën e lojës ishte shumë brilant, por si trajner nuk u barazua kurrë me atë që bëri si lojtar”. Kështu e përshkruan gazetari rumun Kristian Frisk futbollistin Mario Kempes. Në Shqipëri nuk e mbajnë mend vetëm ashtu siç thotë rumuni, por do ta kujtojnë edhe si trajneri i Lushnjës.
Nëse nuk ju kujtohet mirë, mediat rumune zbardhin të gjitha prapaskenat dhe peripecitë që ka kaluar 61-vjeçari kur mori drejtimin e skuadrës shqiptare.
Çantat me para
Mënyra sesi u bind për të pranuar ofertën e Lushnjës ishte “alla shqiptarçe”. Dy çanta të mbushura plot me para trokasin në shtëpinë e tij. Ai kurrsesi nuk mund t’i refuzonte ato. Pas një periudhe të shkurtër si trajner i një skuadre argjentinase që militonte në liga të ulëta në drejtim të tij, erdhi si surprizë një kërkesë interesante.
Në Shqipëri, klubi KF Lushnja i propozoi të merrte drejtimin e skuadrës, pasi arritën të siguronin pjesëmarrjen në Superligën shqiptare. Në 20 dhjetor të vitit 1996, Kempes do të niste një aventurë shumë interesante në Europë. Surpriza e parë ishte nga ana financiare. Kontrata e tij ishte dyvjeçare dhe do të përfitonte 350 mijë dollarë për një vit.
Gjysma e kësaj shume ishte paketuar mirë në dy çanta dhe iu dërgua në shtëpinë e tij. Shqiptarët në atë kohë nuk dinin të përdorin bankat dhe lëviznin me shuma të mëdha parash nëpër duar. Ëndërroi Batistutën
Nëse skuadrat e tjera të Superligës shqiptare do të krenoheshin me titujt e fituar, Lushnja do të krenohej me faktin që ndër radhët e tyre mund të kishte luajtur një sulmues i madh si Gabriel Omar Batistuta. Nuk ishte fantazi e merkatos, por një e vërtetë. Mario Kempes tentoi të transferonte yllin ‘ argjentinas të asaj kohe, që ishte duke shkëlqyer në kampionatin italian.
Entuziazmi i lushnjarëve arriti kulmin kur Batistutës iu bë ofertë, por ky i fundit në mënyrë shumë miqësore dhe të sjellshme i refuzoi. Ishte duke luajtur me Fiorentinën në atë kohë, kur po kalonte vitet më të arta të karrierës së tij.
Arrestohet pronari
Ditët e bukura të Mario Kempesit në Shqipëri nuk ishin të shumta. Entuziazmi nuk ishte konstant sepse pak muaj më vonë iu desh të rikthehej sërish në Argjentinë. Pëllumb Xhaferri, ish-presidenti i skuadrës u arrestua. Skuadra u përfshi në një situatë kaotike dhe tifozët u rebeluan për atë që po ndodhte.
Suksesi më i madh i Kempesit në atë kohë ishte arritja në gjysmëfinalen e Kupës së Shqipërisë, por edhe fitorja 5-0 ndaj Dinamos së asaj kohe. Megjithatë, kjo nuk shërbeu që skuadra të shkruhej në faqet e historisë. Futbolli lushnjar u përfshi në një kaos të vërtetë, por Kempes duket se u dashurua me tifozët dhe qytetin, prandaj donte të gjente një zgjidhje.
I kërkoi ndihmë Maradonës
Mario Kempes u rikthye në Argjentinë për të menduar zgjidhjet për skuadrën e tij. Kontaktoi Diego Armando Maradonën, por nuk e donte si sulmues. Ai u kërkoi ndihmë dy ishshokëve të tij të kombëtares argjentinase, Maradona dhe Pasarela, që ta ndihmonin për të investuar në këtë skuadër.
Të dy nuk pranuan të përfshiheshin në çështje të tilla financiare dhe aventura e Kempesit u ndërpre. Lushnja dhe tifozët e saj do të mbeteshin një kujtim i bukur për të. Ndoshta vetëm njerëzit për mbështetjen pa kushte, sepse të tjerat… Ishin të gjitha për t’u harruar./Panorama Sport
