Nga Flogert Muça
Në dy spotet elektorale të tij, Dr. Halim Kosova shfaqet si një menaxher i suksesshëm dhe njeriu që i ndryshoi fytyrën maternitetit “Mbretëresha Geraldinë” në Tiranë. Madje, e kemi parë të dalë në publik edhe me 3-4 foto që tregojnë fasadën e lyer me gëlqere të maternitetit, si dhe një lulishte atypari.
Nuk po i hyjmë arsyetimit se këto janë gjërat më minimale që një drejtor materniteti për mbi 10 vite, duhet të bëjë së paku për ambientin ku punon vetë çdo ditë. S’po i hyjmë as argumentimit se vendi i punës për të cilin Dr. Halimi po aplikon në 21 qershor, pra për kryetarin e Bashkisë së Tiranës, është shumë herë më i rëndësishëm se sa të qenit drejtor i një materniteti dhe nuk përmbushet vetëm duke lyer 4 muret e një godine. Pas 21 qershorit, kryetari i Bashkisë së Tiranës do të ketë në duart e tij fatin e 1 milion njerëzve.
Por, ama s’mund të lëmë pa botuar këtë kolazh fotosh ku tregohet me vërtetësi dhe lakuriq gjendja e mjeruar dhe skandaloze në të cilën Dr. Halimi ka lënë maternitetin “Mbretëresha Geraldinë” pasi u zgjodh Ministër i Shëndetësisë i qeverisë Berisha. Të paktën, kështu mund të na i kursejë daljet patetike me foto fasadash të lyera me gëlqere nëpër duar. Sepse këto foto tregojnë edhe gjendjen se ku e la Sali Berisha shëndetësinë shqiptare.
