Ushtria Izraelite (IDF) ka ndërmarrë një goditje të fuqishme ndaj infrastrukturës ushtarake të Hezbollahut në Libanin jugor, duke shkatërruar plotësisht një mega-bazë nëntokësore të pozicionuar në zonën e fshatit Majdal Zoun. Lajmi është konfirmuar zyrtarisht mbrëmjen e sotme përmes një njoftimi për shtyp nga zyra e Kryeministrit Benjamin Netanyahu.
Operacioni i koduar si “Sof Pasuk” (Fundi i Kapitullit) ka tronditur rrjetin logjistik të grupit militant, duke asgjësuar një strukturë komplekse taktike.
Sipas të dhënave të inteligjencës të bëra publike nga autoritetet izraelite, mega-baza kishte përmasa të konsiderueshme dhe paraqiste një rrezik të drejtpërdrejtë: Mbi 200 metra tunel nëntokësor; mbi 25 metra nën sipërfaqen e tokës; përmbante qindra armë, municione dhe pajisje luftarake’ infrastruktura kishte disa gropa të fshehura lëshimi, të projektuara dhe të pozicionuara posaçërisht për të goditur territorin izraelit dhe qytetarët e tij.
Përpara se të ndërmerrte shpërthimin e kontrolluar dhe eliminimin e kësaj baze masive, Izraeli ka informuar zyrtarisht Shtetet e Bashkuara të Amerikës dhe përfaqësuesin e posaçëm amerikan në Liban, si pjesë e koordinimit diplomatik mbi marrëdhëniet e tensionuara dhe marrëveshjet e fundit kornizë në rajon.
