Një fëmijë dhe nëna e tij shtatzënë janë në mesin e nëntë personave të vrarë në Gaza pasi Izraeli u kundërpërgjigj me sulme ajrore dhe tanke ndaj 250 raketave të hedhura nga militantët palestinezë matanë kufirit.
Kjo ishte dita e dytë e luftimeve pas një muaji të gjendjes së qetë përreth enklavës së bllokuar dhe erdhi në kohën kur udhëheqësit e Hamasit, grupi militant që e kontrollon Gazan, ndodheshin në Egjipt për të biseduar për arritjen e marrëveshjes së armëpushimit.
Përpos nënës shtatzënë dhe vajzës së saj njëvjeçare, të vdekur u gjetën edhe katër palestinezë të tjerë, përfshirë të riun 22-vjeçar, Emad Nassir, i cili u vra nga sulmet ajrore dhe një 25-vjeçar që u godit nga raketa përderisa po udhëtonte me motoçikletë.
Policia izraelite tha se njëra nga raketat e hedhura nga Gaza e ka goditur një shtëpi në qytetin e Ashkelonit dhe një burrë ka mbetur i vdekur. Katër izraelitë tjerë, përfshirë një grua 80-vjeçare, u plagosën nga raketat e hedhura nga palestinezët, shkruan “The Guardian”.
Shpërthimi i dhunës filloi të premten, kur dy palestinezë u qëlluan për vdekje nga forcat izraelite të sigurisë gjatë protestave në kufirin mes Gazas dhe Izraelit. Në anën tjetër, militantët palestinezë qëlluan dhe plagosën dy ushtarë izraelitë.
Më shumë se 200 palestinezë dhe një ushtar izraelit janë vrarë gjatë këtyre protestave, të cilat filluan vitin e kaluar.
g.kosovari
