Zgjedhjet parlamentare në Izrael kanë lënë të hapur rrugën për formimin e qeverisë së re, pasi as kampi i kryeministrit Benjamin Netanyahu dhe as opozita nuk kanë siguruar shumicën e nevojshme në parlament.
Situata e ndërlikuar politike hap disa mundësi për daljen nga ngërçi, nga një qeveri e unitetit kombëtar deri te organizimi i zgjedhjeve të reja.
Sipas analizës së BBC, katër janë skenarët kryesorë që mund të përcaktojnë të ardhmen politike të Izraelit dhe mënyrën se si Netanyahu mund të qëndrojë në pushtet.
Qeveri e unitetit kombëtar
Një nga mundësitë është krijimi i një koalicioni të gjerë mes partisë Likud të Netanyahut dhe forcave të opozitës. Ky skenar do të kërkonte kapërcimin e kundërshtive të forta politike, pasi një pjesë e opozitës ka zhvilluar fushatë me synimin për t’i dhënë fund qeverisjes së kryeministrit aktual.
Për Netanyahun, një marrëveshje e tillë mund të nënkuptonte rishikimin e aleancave me partitë e djathta dhe ato ultraortodokse, në mënyrë që të sigurohej mbështetja e nevojshme parlamentare.
Marrëveshje me partitë arabe
Një tjetër mundësi është bashkëpunimi i opozitës me partitë arabe për të siguruar shumicën parlamentare. Megjithatë, ky skenar përballet me pengesa politike për shkak të dallimeve ideologjike dhe qëndrimeve të kundërta të partive izraelite për bashkëpunimin me përfaqësuesit arabë.
Një marrëveshje e tillë do të kërkonte negociata të vështira dhe mbështetje të mjaftueshme nga deputetët, në mënyrë që të krijohej një shumicë alternative ndaj qeverisë së Netanyahut.
Riorganizimi i kampit të djathtë
Skenari i tretë parashikon që Netanyahu të përpiqet të zgjerojë mbështetjen e tij përmes marrëveshjeve me parti dhe figura të tjera të së djathtës izraelite.
Megjithatë, kjo mundësi varet nga gatishmëria e këtyre forcave për të bashkëpunuar me kryeministrin. Përplasjet politike dhe mosmarrëveshjet për çështje të rëndësishme, përfshirë shërbimin ushtarak për studentët ultraortodoksë, mund ta vështirësojnë arritjen e një marrëveshjeje.
Zgjedhje të parakohshme
Nëse negociatat dështojnë dhe asnjëra palë nuk arrin të krijojë një qeveri me shumicë parlamentare, Izraeli mund të shkojë sërish në zgjedhje.
Deri në formimin e një qeverie të re dhe Netanyahu mund të vijojë të qëndrojë në detyrë si kryeministër.
