Sulmi raketor i Izraelit mbi territorin iranian ka tronditur strukturat më të larta të sigurisë së Republikës Islamike, duke eliminuar figura kyçe të komandës ushtarake dhe bërthamës strategjike të regjimit të Teheranit.
Në mesin e të vrarëve janë pasuesi i Qasem Soleimanit, komandanti i Gardës Revolucionare, shefi i Shtabit të Përgjithshëm të Ushtrisë dhe zyrtarë të tjerë të lartë ushtarakë, përfshirë këshilltarë dhe shkencëtarë të përfshirë në programin bërthamor. Një operacion i befasishëm, edhe pse tensionet ishin në rritje prej ditësh dhe vetë zyrtarët ishin të vetëdijshëm se ishin objektivë të mundshëm.
Esmail Qaani, pasardhësi i Soleimanit, kishte marrë komandën e Forcave Quds pas vrasjes së paraardhësit të tij në Bagdad në vitin 2020 nga një urdhër i presidentit të atëhershëm amerikan, Donald Trump.
Qaani drejtonte krahun operativ të Gardës Revolucionare jashtë kufijve të Iranit, duke mbështetur organizata si Hezbollah në Liban, Houthit në Jemen dhe milicitë shiite në Siri e Irak, një rrjet që kishte për qëllim rrethimin strategjik të Izraelit. Megjithëse më herët ishte raportuar se ai mund të ishte vrarë në një sulm në Bejrut në tetor 2024, vdekja e tij u konfirmua në këtë sulm të fundit.
Hossein Salami, komandanti i Gardës Revolucionare, një figurë simbol e vijës së ashpër në regjimin iranian, ishte një nga zërat më të fortë kundër Perëndimit dhe një mbështetës i zjarrtë i programit bërthamor iranian.
Pak javë më parë, ai kishte paralajmëruar se çdo sulm kundër Iranit do të kishte pasoja katastrofike dhe se vendi ishte “gati për çdo skenar”. Salami kishte një histori të gjatë brenda Gardës, duke u ngjitur në majat e komandës që nga vitet ’80, dhe ishte sanksionuar nga OKB për rolin e tij në përparimin e kapaciteteve ushtarake dhe bërthamore të Iranit.
Në listën e viktimave është edhe gjenerali Mohammad Bagheri, shefi i shtabit të përgjithshëm të forcave të armatosura dhe figura e dytë më e fuqishme në hierarkinë politike pas liderit suprem Ali Khamenei. Së bashku me të u eliminuan edhe Ali Shamkhani, këshilltar i afërt i Khameneit, gjenerali Gholamali Rashid, zëvendësshefi i shtabit të përgjithshëm, si dhe një numër i paidentifikuar zyrtarësh të tjerë të lartë, truprojash dhe anëtarësh të stafit këshillues.
Goditja izraelite, e papritur në intensitet dhe sukses operativ, përfshiu gjithashtu edhe objektiva nga programi bërthamor iranian. Mes të vrarëve ishin dy nga figurat më të njohura shkencore: Fereydoun Abbasi, ish-drejtor i Organizatës për Energjinë Atomike të Iranit dhe Mohammad Mehdi Tehranchi, fizikant bërthamor dhe president i Universitetit “Islamic Azad”.
Ky sulm mund të përbëjë një pikë kthese të rrezikshme në tensionet mes Izraelit dhe Iranit, duke ndezur edhe më tej frikën për një përshkallëzim të madh rajonal me pasoja të paparashikueshme.
