Një seri shpërthimesh kanë ndodhur në Tel Aviv të premten në mbrëmje sipas orës lokale, ndërsa sirenat u dëgjuan në të gjithë Izraelin pas një breshërie raketash iraniane.
Sipas televizonit francez Bfm,tv, nga sulmi raportohen dëme të konsiderueshme materiale.
Më herët, përfaqësuesi i shërbimit kombëtar të urgjencës së Izraelit, Magen David Adom, tha se pesë persona janë plagosur në zonën metropolitane të Tel Avivit dhe po dërgohen në spital.
Sulmi, të cilin zyrtarët iranianë e quajtën “Operacioni Ndëshkim i Rëndë”, erdhi pasi Izraeli nisi atë që e quajti një sulm parandalues kundër programit bërthamor dhe objektivave ushtarake të Iranit më herët gjatë ditës.
Sulmet izraelite vranë katër komandantë të lartë, përfshirë Gjeneral Major Hossein Salami, kreun e Korpusit të Gardës Revolucionare Islamike të Iranit, sipas ushtrisë izraelite dhe medias shtetërore iraniane.
Shkencëtarë bërthamorë u vranë gjithashtu, raportuan mediat shtetërore. Udhëheqësi suprem i Iranit, Ajatollah Ali Khamenei, premtoi “ndëshkim të rëndë” për sulmet. Presidenti Donald Trump i kërkoi Iranit të “bëjë një marrëveshje” me Izraelin “para se të jetë tepër vonë”.
