Ministri i Jashtëm në largim i Kosovës, Behgjet Pacolli e ka shpallur sot person non-grata laureatin e Nobelit në Letërsi Peter Handke.
“Sot unë kam vendosur ta shpall Peter Handke-n person non-grata në Kosovë për shkak të mbështetjes që ai i ka dhënë Millosheviçit dhe politikave të tij gjenocidale në Kosovë dhe Bosnjë Hercegovinë, gjenocid i kryer nga Serbia. Ai dhe Çmimi Nobel treguan mungesë respekti për viktimat e gjenocidit”, shkruan Pacolli në “Twitter”.
Përzgjedhja e Akademisë Suedeze në muajin tetor për ta shpallur shkrimtarin fitues të Nobel-it në muajin tetor, ngjalli një valë zemërimi në Ballkan.
Ceremonia e dhënies së Çmimit Nobel në Letërsi u bojkotua dhe nga ambasadorët e Shqipërisë, Bosnjes, Kroacisë, Kosovë dhe Turqisë.
Ministri i Jashtëm, Pacolli e konsideroi këtë ditë të turpshme për Evropën dhe njerëzimin. Kjo, tha ai “tregon se Evropa vuan nga harresa për atë çfarë ka ndodhur në Kosovë, Bosnjë e Kroaci”, shkroi ai.
Shoqatat e viktimave të luftës në Bosnjë protestuan përmes një ekrani gjigant në Sarajevë, duke portretizuar laureatin e çmimit Nobel për letërsinë, Peter Handke, si një djall që qëndron pranë kafkave, me një mesazh ku thuhet “turp të keni”. /e.s/
