Julian Sulo, i njohur ndryshe si “Juli i Pashakos”, nuk është hera e parë që pëson një plagosje.
Përveç atentatit të kësaj të marte ku u qëllua në këmbë, ai është plagosur edhe më 11 qershor të vitit 2016, pas ndeshjes Shqipëri-Zvicër, në një pikë bastesh po në qytetin e Lushnjës.
Ndërsa më 2 tetor të vitit 2019, Julian Sulos, i njohur si kundërshtar i Aldo Barës, i është sekuestruar nga policia një shumë e konsiderueshme prej 70 mijë eurosh dhe një makinë me vlerë 100 mijë euro, të cilat dyshoheshin se ishin blerë me burime të ardhura nga aktivitetiti kriminal me të cilin ai merrej, kryesisht në fushën e narkotikëve dhe të krimeve kundër personit.
Në atë kohë, policia njoftoi: “Në kuadër të luftës kundër informalitetit dhe pastrimit të parave, gjurmimit dhe identifikimit të aseteve që janë përfituar nga veprimtari kriminale, pas informacioneve të marra në rrugë operative se shtetasi J. S. merrej me aktivitet kriminal në fushën e narkotikëve dhe krimeve kundër personit, nga strukturat e Krimit Ekonomik e Financiar në DVP Fier u ushtrua kontroll në banesën e tij, ku u gjetën dhe sekuestruan në cilësinë e provës materiale 70,000 euro dhe një automjet me vlerë rreth 100,000 euro.
Specialistët për Hetimin e Krimit Ekonomik e Financiar në Drejtorinë Vendore të Policisë Fier referuan materialet në Prokurorinë pranë Gjykatës Shkallës së Parë Lushnjë, për veprën penale “Pastrimi i produkteve të veprës penale ose veprimtarisë kriminale” për shtetasin J. S., 39 vjeç, banues në Lushnjë. Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe personave të lidhur me të,” theksonte policia në njoftimin e vitit 2019.
Një ngjarje tjetër është ajo e marsit 2018, kur Juli i Pashakos po udhëtonte i armatosur me një makinë të blinduar dhe nuk i është bindur urdhrit të policisë për të ndaluar.
Në atë kohë u organizua një aksion si në filma nga Policia e Lushnjës dhe Forcat e Ndërhyrjes së Shpejtë për arrestimin e tij.
Gjatë ndjekjes, ai braktisi makinën e blinduar dhe tentoi të largohej në këmbë, duke hedhur armën që mbante me vete disa metra larg automjetit.
“Forcat e policisë kërkuan përforcime dhe u vunë në ndjekje të 37-vjeçarit. Falë veprimeve të shpejta të Policisë së Lushnjës dhe FNSH-së Fier, u bë e mundur kapja e tij në lagjen ‘18 Tetori’, Lushnjë. Nga kontrolli në afërsi të mjetit u sekuestrua një pistoletë tip “Grand Power” Q100, një krehër me 15 fishekë dhe një fishek në folenë e armës. Julian Sulo, biznesmen nga Lushnja, nuk është një emër i panjohur për policinë.
Gjatë marrjes në pyetje, 37-vjeçari nuk pranoi të flasë, përveçse deklaroi se udhëtonte i armatosur për vetëmbrojtje, pasi pak kohë më parë kishte tentuar të vritej nga disa persona që e sulmuan me sende të forta. Ngjarja nuk u zbardh, por ndaj tij do të rëndojnë akuzat “Prodhimi dhe shitja pa leje e armëve dhe municionit luftarak” dhe “Mosbindje e punonjësit të policisë së rendit publik”, njoftonte policia.
