Rritja e çmimeve të karburanteve ka detyruar kompanitë kryesore në Itali të ndërhyjnë për të kufizuar kostot për qytetarët.
Gjiganti italian i energjisë Eni ka vendosur një çmim maksimal për karburantet në rrjetin e tij. Nga 28 shtatori, benzina nuk do të shitet mbi 1.99 euro për litër, ndërsa nafta do të ketë një çmim maksimal prej 2.19 euro për litër. Të barabarta në Shqipëri me 201 lekë.
Në nismë është përfshirë edhe IP (Italiana Petroli), një nga kompanitë e mëdha të shpërndarjes së karburanteve në Itali.
Vendimi synon të frenojë rritjen e çmimeve në pompa dhe të lehtësojë kostot për qytetarët, por edhe për bizneset që varen nga transporti.
Qeveria italiane e ka mirëpritur vendimin dhe ka bërë thirrje që edhe kompanitë e tjera të sektorit të marrin masa të ngjashme.
Megjithatë, transportuesit dhe taksistët thonë se çmimet mbeten të larta dhe kërkojnë ndërhyrje të tjera nga qeveria, veçanërisht përmes uljes së taksave dhe akcizave mbi karburantet.
Çmimi tavan nuk do të thotë se të gjitha pikat e karburantit do ta shesin benzinën dhe naftën me këto çmime. Bëhet fjalë për një kufi maksimal të vendosur nga kompanitë për rrjetet e tyre.
Masa vjen në një periudhë kur shtrenjtimi i karburanteve po rrit kostot e transportit dhe po ushtron presion edhe mbi çmimet e produkteve dhe shërbimeve në Itali.
