U kapën mat në orën 02.00 të mëngjesit të kësaj të marte në një parkim publik të komunës së Novellara, Itali, teksa shpërndanin kokainë.
Në telashe përfunduan katër persona, dy shpërndarësit e denoncuar dhe një çift të dashurish për thyerjen e dekretit të karantinimit.
Dy shpërndarësit janë shqiptarët Armando Muça, 30 vjeç me banim në Novellara, dhe shoku i tij Kliti Alizoti, 32 vjeç, pa leje qëndrimi.
Ata lëviznin me makinë për të shitur drogë, por u pikasën nga policia e Novellara teksa shkëmbenin dozat me paratë, me klientin 32 vjeç, i cili shoqërohej nga e fejuara 24 vjeçe.
Muça dhe Alizoti u arrestuan me akuzën e shpërndarjes së lëndës narkotike. Policia sekuestroi disa doza, para dhe pajisje për paketimin dhe peshimin e dozave.
Operacioni u zhvillua në rrugën ‘Vittoria’, kur policia pa një makinë ‘Fiat Punto’, në të cilën ndodheshin dy shqiptarët dhe një tjetër ku ndodhej çifti i të dashurve, tip ‘Renault Megane’. 32-vjeçari italian nga Luzzara u gjet me një dozë kokainë, të cilën sapo e kishte blerë tek dy shqiptarët.
Nga kontrolli në banesën e shqiptarëve u gjetën disa doza të tjera si dhe materiale për paketim, bashkë me një shumë parash prej 3 mijë euro.
Policia gjeti fotografi dhe mesazhe që cilësohen të lidhura me shpërndarjen. Krahas për lëndën narkotike, dy shqiptarët u proceduan edhe për thyerje të rregullit të karantinës. /a.r
